1:1跑車模擬器

其實香港並不只得一間這種賽車模擬器中心，但有這款1:1 F1模擬器的，暫時仍是只此一家。此模擬器是由匈牙利廠商Formula Factory生產，車身設計及尺寸完全依足Scuderia Ferrari的真正F1戰車，最抵死是車殼上連贊助商的商標也一樣印足。

模擬器需連接電腦來運作，所採用的遊戲軟件名為《rFactor》，總共提供20條賽道給玩家選擇，包括我們最熟悉的澳門賽道，玩家亦可自行決定與最多19個電腦對手作賽，但是不能轉換車款。駕駛位前方安裝的3個全高清屏幕，能模擬出180度的駕駛視野，筆者覺得畫面像真度幾高，更連不少細節位也有畫出來。另外，車身周圍還有5.1聲效系統，進一步提供臨場感。

頭搖又尾擺

玩家主要操控的就是軚盤、油門與brake，不過軚盤上面共有十幾個掣，筆者聽現場職員講解了數分鐘，才大概明白它們的功用。軚盤幾實淨，而且具備震動效果，所以當我玩了幾個圈之後，雙手有點酸軟感覺，但這也是真實感的重要來源之一。

而模擬器是坐落於一個四向油壓活動系統上面，除了基本震動，駕駛時還會依據賽道的角度向前、後、左、右傾斜，為玩家帶來更實在的行駛感覺，就現場觀察，傾斜幅度相當大！駕駛位亦頗為像真，玩家坐下去後，還需伸直雙腳才能踩到油門及brake，整個人就像半臥於車廂內。體型龐大的筆者直到這次試玩，才知道F1跑車的駕駛位真的十分狹窄，我差點坐不進去，玩完後起身亦有點難度。至於玩這模擬器的身高下限則是1.45米，而且不建議8歲以下小童玩。

車壇教父呂米高

「當然唔能夠話部模擬器同真車一樣，但係軚盤、油門同brake嘅操控感確實做得幾似真車。軚盤其實唔使郁太多，油門亦係踩一嘢就即刻颷住去；brake更加同普通遊戲機嘅賽車game唔同，佢哋根本唔使踩brake都玩到，但呢個模擬器唔踩brake就實炒，整體嚟講係需要較高嘅駕駛技術先玩得好。

同埋佢已經做到訓練作用，我好耐冇走過澳門條賽道，開頭賽番都有少少生疏，但幾個圈之後熟咗就快番；其他賽道我一樣要揸幾個圈睇吓邊個係快彎、邊個係慢彎、用咩gearing先玩得好，唔係高手一坐落去就揸得快㗎！同埋佢啲景畫得好似，畫面又流暢，再配埋音效各樣嘢，講駕駛感覺都算幾真。」

賽車手洗浩明

「模擬器梗係冇真F1咁多掣，但有啲比較重要嘅都保留番，譬如KERS（動能回收系統），我一起步想增加車速就要㩒呢個掣嚟輔助，希望喺入T1嘅時候唔好輸咁多位置。同埋大直路嘅風阻效應都做得好接近真車，我喺前車後面食住佢嘅氣流，再抽出嚟嗰吓咁細微嘅感覺都做到好像真。而且啲電腦對手嘅走法都幾似真人，所以係好唔錯嘅模擬練習。」

9車同場作賽

其實這間模擬器中心「321 PLAY」除有1:1 F1模擬器坐鎮外，還有另外9部由英國廠商Vesaro生產的座椅式賽車模擬器，它們同樣具備DBOX震動系統及5.1環繞聲效果，其中兩部亦配備3個屏幕，照樣提供180度的畫面視野。不過它們最好玩之處是9部機能夠互相連線，讓最多9位玩家一起同場比賽，而且除了F1賽外，還可選擇玩房車賽或拉力賽，玩法更多元化，可以玩多幾鋪。

收費

非繁忙時段 (星期一至五，下午12時至5時)
單屏幕模擬器：$180 / 30分鐘 或 $320 / 60分鐘
三屏幕模擬器：$320 / 30分鐘 或 $580 / 60分鐘
F1賽車模擬器：$170 / 15分鐘 或 $320 / 30分鐘
繁忙時段 (星期一至五，下午5時至晚上10時 / 星期六、日及公眾假期，全日)
單屏幕模擬器：$250 / 30分鐘 或 $430 / 60分鐘
三屏幕模擬器：$380 / 30分鐘 或 $680 / 60分鐘
F1賽車模擬器：$220 / 15分鐘 或 $380 / 30分鐘
*接受包場，價錢另議。
查詢：321 PLAY　www.321play.com.hk