捕捉男人最專注時刻　智能尿兜設屏幕播廣告

文：MenClub 路兒　　圖：互聯網
POSTED ON 12 Dec 2017

當閣下的巨龍出海，一腔快意猶如滔滔江水連綿不絕嘅時候，除咗望吓隔離暗自格吓劍之外，實際上都真係冇乜嘢好做。有公司就睇中呢「黃金10秒」，喺尿兜上加設智能廣告板，連呢段時間都要爭取「吸引」你睇廣告。

荷蘭一間初創公司研發出智能尿兜Mr. Friendly，喺尿兜上方加設一面屏幕，智能嘅地方在於尿兜內置感應器，每當感應到有人企喺尿兜前面時，先至會喺屏幕播出廣告，唔會「浪費」一分一秒。公司口號為「收視保證」，話時機係最緊要，廣告能夠留下深刻印象，就已經掌握先機。

Mr. Friendly亦連接雲端平台，廣告商可以喺特定地方，例如健身室、餐廳、酒店等等，針對特定嘅男士，播放不同嘅廣告，亦可以隨時更換。對廣告商嚟講，聽落係多個渠道去傳播廣告訊息；但對受眾嚟講，喂阿哥，痾個尿啫，放過我啦好冇？