自從電競獲正式加入成為亞運獎牌項目後，連政府都睇高一線高調支持話有發展潛力。下月初國家體育總局就同K11及香港電競總會合辦「海峽兩岸暨港澳地區──K11電競錦標賽」，尋日率先舉行港隊選拔賽。你識打《FIFA》，佢識打《FIFA》；點解佢入到電競香港代表隊，你入唔到？公平咩？

「海峽兩岸暨港澳地區──K11電競錦標賽」由國家體育總局主辦，挾住首個官方電競比賽之名而來，來勢洶洶。決賽將於1月5至7日一連三日假觀塘KOHO大樓舉行，由兩岸四地十六支隊伍對戰，為亞運嚟個賽前預演。比賽共有四個項目，包括《FIFA 18》、《王室戰爭Clash Royale》、《CS:GO》及《英雄聯盟》。《CS:GO》選拔賽將於12月26日舉行，而《英雄聯盟》的香港代表隊，則會由香港聯賽冠軍隊伍出任。

決賽時亦有專人即時分析戰術及賽情，大家可以免費入場觀戰。勝出隊伍可以拎走高達35萬港元獎金，以及周大福 x MONOLOGUE冠軍鑽石指環；《英雄聯盟》名將Toyz亦會擔任香港代表隊教練。