昨日Apple正面承認會刻意令舊iPhone愈行愈慢，並指目的係為咗延長電池壽命，防止手機突然死機。事件震驚各界，有用家話唔接受呢個解釋喎，咁點呀？美國兩名iPhone用家就一於入稟控告Apple，為大家出返啖氣。

美國洛杉磯居民Stefan Bogdanovich及Dakota Speas由律師代表入稟加州地區法院，控告Apple於推出新iPhone型號時，刻意調慢其舊iPhone型號。兩人擁有iPhone 7及多款iPhone，亦發覺「每當有新型號上市時，舊型號就會慢下來」，有關做法違反雙方交易時簽訂的默示合同，而且未有適當地披露詳情。兩人認為Apple未經同意就減慢裝置速度，亦未有提供選擇權，要求代表加州及全美國居民執行集體訴訟。

Apple昨日發聲明指，基於鋰電池於寒冷天氣、低電量或老化時會影響表現，會引致裝置突然關機，於是去年官方就透過iOS 10.2.1更新加入新功能，「緩和處理器的瞬時峰值，避免手機突然關機」。此項電源管理功能已適用於iPhone 6、iPhone 6s及iPhone SE，預計未來會透過iOS 11.2擴至iPhone 7及其他產品。

來源：MacRumors