想當年日煲夜煲機舖，就係為咗練成合埋眼都可以完美連擊成為太鼓之達人；今日終於可以再演身手啦！任天堂宣布Switch版《太鼓之達人》將登陸Switch平台，將Joy-con變鼓棍，仲唔約返班Friend挑機？

任天堂喺遊戲預告Nintendo Direct中宣布，《太鼓之達人》將於2018年夏季推出Switch版本，利用Joy-con變身成鼓棍，用體感方法打鼓，一樣有單打有雙打，最緊要係方便拎出街玩丫嘛。歌曲方面就有《Super Ｍario Odyssey》同《Splatoon》新歌，仲有小遊戲添。

第二款注目作品係《Mario Tennis Aces》(馬里奧網球)，同樣可以用Joy-con操控，以體感方式打網球，大大力開波或抽擊都得，亦可以Chok出特殊擊球模式，仲有食人花等騎呢嘢亂入。遊戲支援最多四人對戰，預計2018年6月推出，一班人玩最開心。

3. 《古惑狼三部曲》

一如傳聞，《古惑狼三部曲》將會推出Switch版本。呢款早於1996年喺PlayStation平台上發行嘅遊戲，憑關卡多特色而且視覺效果豐富，廣受玩家歡迎，上年推出PS4重製版，今年移植到Switch平台，預計7月發行，玩家最開心啦。

4. 《Dark Souls》

《Dark Souls》將會於Switch平台推出重製版，5月正式發售，今回任天堂仲出埋《Dark Souls》太陽騎士Amiibo對應遊戲，並支援6人網上對戰，好玩度大增，騎士們準備好啦。

以日本神話為舞台嘅《大神 絕景版》將會登上Switch舞台，圍繞天神降世白狼為取回神力，封印八歧大蛇嘅冒險旅程。遊戲仿水墨畫風別具一格，預計2018年夏天發售。