全靠太陽能　一氧化二氫任你飲

文：MenClub Patrick　　圖：互聯網
POSTED ON 04 Nov 2014

以前睇《人在野》，成日見Bear Grylls教人點樣土法自製飲用水，但硬係覺得好牙煙，心諗咁都飲得？但係最近睇呢個奧地利設計師Kristof Retezar整嘅「Fontus」自動注水樽，就覺得安全可靠得多，真係夠膽飲。

自己識變水出嚟咁神奇？其實成件事好簡單，唔使諗到咁複雜，佢只不過係將空氣入面嘅水分凝結變成水，平時大家都做得到，而且等如係蒸餾水，保證乾淨，問題係要搞幾耐先整到夠飲嘅水啫。所以，為咗加強冷凍效能，Fontus就用到太陽能嚟驅動，每粒鐘可以凝結到500ml水，都夠飲喎，不過夜晚就唔知點算喇，唔通搵電筒照住佢？目前Kristof Retezar將Fontus設計成單車專用，畀人踩車踩到去荒山野嶺時唔驚冇水飲，但其實再發大啲嚟搞嘅話，整到變汽車用都得喎。不過到時有咁大件「一氧化二氫（H2O）」裝置，藍帶軍又可能當係生化武器㗎喇。