- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| 係人都知食煙唔健康，係人都覺$55一包煙貴，但戒唔甩有咩辦法？不過，有陣時食煙都係心癮嚟啫，冇話冇替代品嘅！就好似電子煙（Electronic Cigarette），喺歐美流行之後，真係有調查話佢能令煙民食少咗煙；就算唔係人人有效，都起碼唔係明火，少咗一份危險，亦都冇咁臭先啦，唔怪得逐漸變成埋潮人嘅玩意。 今年年頭，電子煙開始流入香港，由初時大家都唔知佢合唔合法、只喺網上或者格仔舖鬼鬼祟祟賣，到而家賣嘅地方愈嚟愈多，仲有埋實體專門店添。睇嚟呢種潮物都有機會喺本港遍地開花，今次請嚟電子煙專門店Check-Point嘅負責人阿Milk為Gentleman講解一下，睇吓啱唔啱你食？ | |
Check-Point負責人阿Milk | |
| 冇尼古丁、焦油 唔受衛生署管 首先，法律問題一定要釐清。阿Milk話真正嘅明火香煙係歸衞生署監管，但佢哋賣嘅電子煙所用嘅「煙油」，其實主要係由植物精油及蔬菜甘油製成，並獲得「美國食物及藥物管理局」認證，不含尼古丁及焦油兩種真正香煙成分，等如吸加熱咗嘅植物油蒸氣，根本唔算係「煙」，所以唔受衛生署監管，大家亦唔好鬧筆者鼓吹食煙。 而呢幾年嚟世界各地都有聲音話打算立法規管電子煙，甚至乎禁售，其實係針對用含有尼古丁同焦油嘅「真煙油」嚟吸食嘅電子煙，因為有研究指咁食法，會比食明火真煙吸入更大量有害物質。雖然係咁，阿Milk都奉勸大家唔好畀細路仔接觸到佢哋呢啲冇尼古丁同焦油嘅電子煙，費事提高佢哋食真煙嘅意欲咁話喎。 | |
| |
| 熱力揮發「煙油」 咁到底電子煙嘅構造係點？阿Milk話無論係平定貴嘅煙款、design係直筆甩一支定整到成奇形怪狀（例如煙斗形），結構主要都只分為兩部分：主體嘅電池部分，同埋包括「煙油」容器、纖維棉芯及吸嘴嘅霧化器。運作原理好簡單，就係纖維棉芯入面嘅發熱線藉住電池電力加熱（需按開關掣），將容器入面嘅「煙油」霧化，經過吸嘴畀用家吸入再呼出。 | |
電池 霧化器 完整的電子煙 | |
| 愈貴愈大霧 阿Milk舖頭賣嘅電子煙電池，由$400到$4,000不等，平款通常都係用內置充電池，每充一次至少夠食相等於兩包煙嘅時間；貴款就多數係入一粒粒嘅充電芯，最多食成個幾兩個星期都唔使叉電。另外，平款電池嘅電壓會比較低，能產生嘅煙霧少啲，鍾意「扯得行」嘅煙民未必過到癮；唔少貴款電池就因電壓好強勁，所以能夠產生濃厚煙霧，唔止食得較盡興，更加有視覺效果。而且貴款電池多數仲有埋電壓調校功能，任用家自由選擇吸大霧定細霧，亦可能配備埋顯示屏，連吸咗幾多吓都會記低。 | |
通常係轉動電池底部嚟調校電壓 貴煙款用的可替換式充電芯 | |
| $80頂5包煙 至於霧化器，就大約$100至$650一個，視乎款式、容量、材質與發熱線數量等而定，發熱線多，都能幫助產生更大煙霧；再加上需買一個充電器，新手上車，全套裝備嘅最低入場費大約係五百幾蚊。另外，食得一、兩個月，就要換一次纖維棉芯，$30至$80一個，唔換的話可能會食到異味。仲有「煙油」，每支10ml賣$80，一支分量大約等如5包煙，$80頂$275（$55x5），買電子煙筆錢好快慳到返嚟啫。 | |
霧化器拆解圖 不同款式的纖維棉芯 | |
| 糖果飲品生果花 甜香「煙油」唔臭 講到「煙油」，阿Milk間舖有成71種味道畀客人選擇，除咗比較大路嘅生果同花香外，竟然連朱古力、棉花糖、可樂、香檳、雞尾酒等糖果同飲品都有。筆者從旁睇住阿Milk試食生果「煙油」，聞落只覺好重嘅甜香味，有啲似香薰，完全唔會臭，喺屋企或公眾地方食都唔會惹人反感。若然真係想用電子煙嚟代替真煙，仲可以揀番仿真濃味煙或薄荷煙味嘅「煙油」，但味道始終比較淡。 | |
「煙油」有多達71種味道 | |
| 戒心癮多過戒煙癮 不過問到電子煙可唔可以用嚟戒煙，阿Milk就答得相當避忌：「我唔會用『戒煙』呢個字眼，萬一有啲人戒唔到咪會返嚟話我！呢啲電子煙點都唔同戒煙貼嗰啲嘢，冇尼古丁，其實原意唔係要嚟戒煙。」但係點解有調查指煙民食完之後會食少咗真煙？「我都聽唔少客講食少咗真煙，我諗有支『煙』畀佢哋揸吓『扯』吓，就頂到條心癮啩。」 阿Milk又話，幫襯佢間舖嘅，最多係廿零歲嘅後生仔女，睇落都幾潮，唔覺得佢哋食電子煙係為咗戒煙，似係貪玩居多。Gentleman，有冇興趣玩一玩呀？ | |
特別款式的電子煙
| |
| Check-Point 地址：灣仔東方188商場1樓110號舗 網址：checkpointecigar.wix.com/checkpointecigar
| |