天文現象總係可遇不可求，尤其是一瞬即逝嘅流星雨，就算坐定定睇都可能會走漏眼，如果有場包睇到嘅流星雨你又有無興趣？研發人造流星雨嘅日本初創公司ALE日前表示，正準備喺2020年春天於廣島上演全球首個人造流星雨表演。ALE係以人造衛星於太空發射小球狀嘅流星源，當流星源進入大氣層就會燃燒，尤如真嘅流星雨一樣。

由2011年開始創立並研究流星雨嘅日本初創公司ALE，正係準備緊喺2020年初於日本廣島上演全球首個人造流星雨，而負責進行流星雨嘅2顆人造衛星已經進入研發嘅最後階段，衛星喺明年3月前由日本太空機構發射上太空。

ALE創辦人兼東京大學天文學博士岡島礼奈表示，「我哋鎖定嘅(觀眾)係全世界，而我哋嘅流星將會喺全球放送」。岡島礼奈指出，每顆衛星可以運載 400 個小球狀流星源，當中嘅化學配方係秘密，而400 個流星源將可以上演 20 至 30 次人造流星雨，衛星則可以喺太空停留約 2 年。

早喺去年5月ALE曾經表示，計劃喺2020 年東京奧運開幕禮上演人造流星雨，相信2020年年初廣島人造流星雨上演成功後，人造流星雨亦會好大機會出現喺東京奧運上。早前有外媒報道指出，一顆流星源造價約 8,000 美元，睇嚟東京奧運嘅Budget要準備充足！

來源：Japan Times