有咩慘得過公司私有化失敗完，人才又被Apple一一挖走？就係加埋公司債台高築！今年嘅Tesla可以話係「屋漏兼逢連夜雨」，工廠頻頻失火不突止，電動車Model 3生產更一度受多項問題困擾，究竟Tesla創辦人Elon Musk仲有啲咩板斧面對困境呢。

根據《Reuters》報導指，Tesla放棄私有化計劃後，旗下嘅電動車Model 3生產看似逐漸上軌道，令到Tesla今年下半年嘅燒錢速度有所下降，但其實暗藏危機。華爾街分析師普遍認為，Tesla無幾耐之後就會出現資金短缺問題，並估計年底需要籌集約20億美元資金維持公司流動性，再加上Model 3嘅產能受到市場嘅嚴格關注，令Tesla逐步陷入財政困境。

先唔諗會唔會有白武士出手相救(事關Elon Musk平時都得罪人多)，究竟有無方法可以自救？辦法總比困難多，市場預期Tesla目前最有可能就係發行「可換股債券」，呢種「進可攻、退可守」嘅金融產品雖然可以為Tesla帶嚟生機。

但凡事無兩全其美，發行「可換股債券」可能會為Tesla引嚟更多人狙擊沽空，因為當Tesla股價高於某一水平時，債券持有人可以將債券換成股票，一來令Tesla股分攤薄，二來會吸引投機者沽空。睇返往績，Tesla由2013年第4季開始至今只有一季現金流為正數，目前已經揹緊105億美元債務，未來12個月仲會有13億美元債務到期，難怪會令人非常擔心前景。

來源：Reuters