微軟今日喺紐約發布咗最新嘅Surface產品系列，包括Surface Pro 6、Surface Laptop 2、Surface Studio 2等新產品。發布會一如市場傳聞，新推出嘅Surface Pro被命名為Surface Pro 6，並換上咗Intel第8代Core i系列處理器，仲加入咗新嘅磨砂黑色，齊齊產品有咩特別！

今次微軟為Surface系列作大規模更新，其中焦點產品Surface Pro 6除咗原有嘅銀白色外，仲新加入咗磨砂黑色，同時鍵盤保護蓋亦提供黑、藍、紅及灰色。Surface Pro 6重約1.7磅，電池續航時間長達13.5小時，而機身內部散熱進一步改善，較上一代Surface Pro效能提升約67%。配備Core i5處理器嘅Surface Pro 6標準款價格為899美元，而採用Core i7、16GB Ram及1TB SSD嘅最高階版售價為1899美元。

此外，微軟亦推出咗第二代Surface Laptop 2，除咗原有嘅白金、墨金、酒紅、鈷藍4色外，同樣加入咗磨砂黑色。規格上Surface Laptop 2與上一代無太大變化，而內置處理器升級為Intel Core第8代4核心處理器，速度提升85％，並配備13.5吋PixelSense顯示器、OmniSonic揚聲器，可提供14.5 小時電池續航力，售價由999美元起。

至於微軟嘅一體式觸控Desktop亦有更新，今次發布會推出咗新嘅Surface Studio 2，佢配備28吋Brilliant PixelSense顯示器，亮度、對比度及圖形性能都分別較上一代提高咗38%、22%及50%。外觀上與上一代基本相同，但佢支援 USB-C連接埠，以及具遊戲級效能嘅Xbox Wireless，售價由3499美元起。Surface Pro 6、Surface Laptop 2及Surface Studio 2都同樣喺今天開始接受預訂，於10月16日發貨。

另外，今次微軟發布會仲多咗一個意料之外嘅產品，佢就係無線藍牙頭戴式耳機Surface Headphones。呢個新耳機右邊轉盤可以調節音量，左邊轉盤則可以調節降噪程度，而耳機上嘅觸控按鈕可以暫停或播放音樂、接聽來電、音樂快轉等。當用戶除低耳機亦會自動暫停播放音樂。Surface Headphones重0.64磅，電池續航時間長達15小時，可以用USB-C喺大約兩個小時內充滿電。耳機售價為349美元，但目前未有確認具體發貨日期。