玩頸玩成晚　到底有乜玩？

文：MenClub Patrick　　圖：互聯網
POSTED ON 27 Nov 2014

當年《龍在邊緣》龍方望實萬二蚊雙長腿，講出經典金句「淨係玩對腳都玩成晚」，畀世人知道原來腳係好好玩。利申，小編並非「腳膠」，其實一直唔知對腳到底點可以玩咁耐，但最近見到強國有公司設計咗號稱係全球首條嘅智能頸帶「Fineck」，覺得戴住佢上頸，就真係可以玩頸玩成晚。
Video：www.fineck.com/video/fineck.mp4
講得簡單啲，Fineck嘅使用方法，就好似一般智能手帶咁，透過貼實頸椎嘅智能內核，感測用家頸部以至脊骨嘅活動狀況。若然俾佢知道你長時間做耷低頭、烏低身、駝背等等佢認為係唔健康嘅姿勢，就會靠震動嚟提醒你改善一下。佢又可以制定目標，久唔久就提你做吓舒展頸部嘅運動，仲有得幫你記錄卡路里消耗量等資料，再經藍牙傳送去手機專用app，畀你睇番。不過，最抵死係佢仲有啲對應嘅手機mini game，要靠fing條頸嚟操控嘅，得閒fing幾fing，真係可以玩成晚，仲可能唔fing唔知條頸好㗎！但係唔好搭車搭lift嗰時fing喎，俾人以為你黐線就唔好啦。