相信大家印象中嘅飛機都係由引擎等嘅活動部件推動，不過近日麻省理工學院(MIT)研究人員諗到以新方式去創造飛機。呢部飛機係第一架唔需要任何使用活動部件嘅飛機，佢利用咗電極推動離子並產生離子風，而飛機透過離子風所產生嘅動力飛行。

由MIT研究人員所創造嘅飛機可以話係非常革命性，因為佢無採用到任何可以活動嘅部件推動，而係用離子風所推動。其實飛機能夠產能離子風推動飛行嘅原理係咁嘅，於飛機前方設置咗一片通過高壓電力(40,000V)嘅金屬線，而金屬線會將飛機前方嘅空間離子化，被離子化嘅空氣分子會被後方第二片金屬線嘅負極向後吸走，從而產生離子風推動飛機。

MIT研究人員製作咗一架重2.45kg，翼展達5米嘅原型機，而原型機喺全長60米嘅體育館中完成首成首次試飛，試飛期間飛機以每秒4.8米於體育館內飛行咗55米。MIT航空工程師巴雷特表示，製作飛機由科幻電視劇《星空奇遇記》內得到啟發，並認為未來飛機唔應該再依賴螺旋槳或渦輪，但短期內人類都仲未搭到呢種飛機。

來源：Engadget