相信經常喺YouTube睇片嘅你都會喺片中見過唔同框框嘅注解(Annotations)，不過由於過去呢個功能嘅使用頻率唔高，而且喺移動裝置上根本用唔著。日前YouTube正式宣布，會喺2019年1月15日起將系統內所有影片注釋移除，即係話所有舊影片嘅注解都會通通消失。

而家越嚟越多人用智能電話、平板電腦，甚至用智能電視嚟睇YouTube影片，只能夠喺傳統Desktop上顯示嘅注解功能自然慢慢會被淘汰。所以早於2017年YouTube已經刪除咗注解編輯器，移除咗創建新注解或編輯現有注解嘅功能。

另外，YouTube早前亦陸續推出咗可以跨平台支援嘅資訊卡及結束畫面功能，唔多唔少都透露咗要取代舊注解功能嘅意圖；而YouTube亦表示，如今注解功能嘅使用率已降低咗70%以上。其實今時今日剪片應用程式越嚟越普及化，普通人都好容易可以為影片加入標註，所以注解功能嘅消失都係好自然嘅事。