近年華為積極喺手機市場上搶奪市佔，日前Bloomberg嘅報道指出，有知情人士透露華為正計劃推出一款拍攝到3D照片嘅新手機，手機代號為Princeton，並將用上Sony開發嘅相機傳感器，可以透過光線反射嚟精確測量距離。

報道引述知情人士透露，呢個3D鏡頭除咗可以拍攝由多個角度觀看嘅圖片外，仲可以創造出AR技術應用嘅3D人物及物體模型。其實3D鏡頭嘅傳感器製造商Sony喺2015年收購咗位於比利時布魯塞爾嘅Softkinetic後，加快咗3D拍攝技術嘅開發速度，並將技術與自身半導體製造技術結合，創造咗可以放入智能手機嘅小型3D晶片。

據了解，華為呢部名為Princeton嘅新3D拍攝手機將會喺今個月發布，而發布後將會於數星期內推出發售。另外，華為亦有可能喺多款2019年推出嘅新手機用上3D拍攝鏡頭，不過具體計劃仍有可能改變。

來源：Bloomberg