兩年前Sony推出專業攝錄器RX0，但由於定位小眾未有取得大成功，而兩年後第二代RX0 II捲土重來，加入上翻180°及下翻90°LCD屏幕，相機更能夠於10米水深使用，令呢部機成為咗GoPro Hero 7嘅強勁對手，並主打Vlogging，啱晒而家鍾意旅行嘅年輕人。

規格方面，RX0 II繼續仲上一代嘅防水防塵及抗壓性能，不過今次新機仲可以喺10米水深下操作，而且加入咗可以上翻180°及下翻90°嘅LCD屏幕，方便用家拍攝時睇到鏡頭所拍攝畫面。RX0 II搭載咗塊1530萬像素嘅1吋Exmor RS CMOS 感光元件，而影像感應器升級為BIONZ X。喺感光度方面，RX0 II配有ISO 80-12800，而鏡頭就搭載蔡司等效24mm f/4嘅定焦廣角鏡頭，最短對焦距離由50cm縮至20cm，用家要進行近距離拍攝就更方便。

RX0 II主打Vlogging，用家可以將相機配上另購嘅VCT-SGR1拍攝手柄，令相機成為非常輕便嘅Vlog工具，如果想收音更專業清晰，仲可以安裝配件支架，同時連相機及收音咪，以達到更專業嘅Vlog拍攝效果。

新推出嘅RX0 II可以透過Imaging Edge Mobile應用程式，將4K影片直接傳送到手機，仲可以透過應用程式無線控制多達5部RX0 II進入拍攝。RX0 II定價為 700美元，即約港幣HK$5500，而今年4月RX0 II將於北美地區推出，香港就未有發售消息。

來源：The Verge