日前《Bloomberg》引述消息人士指，中國科網巨頭之一阿里巴巴正考慮於香港進行二次上市，而預期集資額達到200億美元，即約1560億港元。消息指出，阿里巴巴目前與財務顧問討論於香港二次上市嘅計劃，估計最快會於今年下半年向港交所秘密提交上市申請。

其實阿里巴巴喺香港二次上市並非突如其來嘅事，去年一月阿里巴巴創辦人馬雲與特首林鄭月娥曾經喺公開場合上對談，而當時馬雲就指出會認真考慮將阿里巴巴喺香港上市；而港交所行政總裁李小加喺上月亦經曾向中國傳媒表示，阿里巴巴百分之百會回來，只係時間長短嘅問題，而選擇上海或香港上市就係阿里巴巴嘅選擇。

如果有留意阿里巴巴的話，應該會知早於淘寶成為大家生活一部分前，阿里巴巴曾經喺2007年11月透過旗下B2B公司登錄港交所，並一共募資116億港元，成為當時中國互聯網公司融資規模之最。後來因為金融危機令阿里巴巴B2B公司股價一直暴跌，加上C2C市場擴大、B2C領域再度蓬勃等因素影響，最終阿里巴巴B2B公司於2012年選擇私有化，退出港交所。

來源：Bloomberg