以往講 iOS 裝置可以包括 iPhone、iPod 及 iPad，不過由今日可以就再唔包括 iPad 喇！因為 Apple 喺 WWDC 2019 中正式為 iPad 推出專屬於作業系統 iPadOS，當中包括咗支援滑鼠，以及可以直讀 USB 裝置嘅文件管理。想知仲有咩新功能？而家就一齊睇吓！

iPad 介面重新設計

Apple 全新推出嘅 iPadOS 為 iPad 帶嚟咗全新嘅 Home 主頁介面，雖然睇起上嚟同以往嘅 iOS iPad 介面差唔多，但當用家將 iPad 橫置時就可以同時顯示 Apps 及 Today View 介面，令用家可以快速瀏覽常用 Widget ，查閱新聞、行事曆、天氣等資訊，減少以往被浪費嘅 iPad 螢幕空間。

更新 Split View 及 Slide Over  提高實用度

全新 iPadOS 令 iPad 實用程度大大提高，當中更新咗 Split View，用家可以喺 iPad 上同時開啟一個 App 嘅不同 File，例如打開 Notes 可以左右同時顯示不同文件，或者顯示兩個唔同嘅 Office Word 檔。

而 Slide Over 功能中，用家可以喺 iPadOS 加入多個常用 App，以 Tap 及拖曳等方式轉換側欄 Apps。例如用家喺使用 Mail 時，可以運用 Slide Over 功能檢視 Calendar 或 Reminder 內容。而 Slide Over 亦可以儲存多個 App 嘅組合，提升用家轉換速度及工作效率。

Apple Pencil更好用  延遲速度降至 9ms

相信唔少 iPad 用家有配備多支 Apple Pencil，今次 iPadOS 嘅推出亦令 Apple Pencil 功能更加好用。以往用家使用 Apple Pencil 作圖片編輯時，Apple Pencil 嘅工具列永遠只顯示於螢幕下方，而用上咗 iPadOS 後，用家就可以自由拖曳工具列到螢幕唔同位置，增加編輯自由度。

另外，喺新 iPadOS 中 Apple Pencil 嘅延遲速度進一步下降。例如喺去年推出嘅 iPad Pro 中，Apple Pencil 嘅延遲速度由 20ms 下降至 9ms，令用家運用 Apple Pencil 書寫、畫畫時能夠更流暢、準確。

首次支援滑鼠  包括藍牙或USB

iPadOS 推出後，首次為 iPad 引入滑鼠支援，令 iPad 實用性進一步提高，亦為對手 Microsoft 嘅 Surface 平板電腦系列添上壓力。喺操作方面，用家可以喺 iPadOS 嘅 Setting 中，進入 Assistive Touch，選擇 Pointing Device，以連接藍牙或 USB 滑鼠。用家可以調節滑鼠嘅左鍵、右鍵、滾輪等按鈕，同時亦可以調節滑鼠靈敏度。

Hello mouse support on iOS 13! It’s an AssistiveTouch feature, and works with USB mice. @viticci nailed this pic.twitter.com/nj6xGAKSg0

— Steve Troughton-Smith (@stroughtonsmith) June 3, 2019

全新 File 管理系統  支援讀取 USB 及 SD 卡

喺 iPadOS 下，File App 除咗支援 iCloud Drive 共享檔案夾，亦都支援讀取 USB 及輸入檔案，或者透過讀卡器讀取外部檔案 SD 卡嘅檔案。而喺 File App 內，亦加入咗全新 Column View ，令用家更容易管理 File 內嘅檔案，並支援壓縮及解壓縮檔案功能。

新增簡易手勢操作

今次 iPadOS 為加入咗更多簡易手勢操作，其中3個都係關於文字編輯方面，例如三指內收係「複製」、三指外放係「貼上」、而三指向左滑動就係「 Undo」。而用家只要喺某個位置按住唔放，就可以移動螢幕上嘅遊標，再使用一點一拉就可以選取一大段文字。