Sony 噚日喺香港正式發布第二代玻璃共振無線喇叭 LSPX-S2，呢個喇叭來頭唔細，榮獲德國 Red Dot 產品設計 2019: Best of the Best 奬項。佢除咗能夠播出360度環繞高解析度音訊，仲可以透過有機玻璃中嘅 LED 燈仿製出燭光效果；同場 Sony 仲推出咗全新 EXTRA BASS 系列防水無線喇叭。

Sony 玻璃共振無線喇叭 LSPX-S2 外型設計簡約，單睇喇叭嘅外表真係會以為佢只係一個 LED 氛圍燈，但其實喇叭喺有機玻璃管下方設有垂直驅動器，能夠360度播放環繞聲音樂。此外，LSPX-S2 仲支援高解析度音訊，並可以透過有機玻璃管嘅高音喇叭擴大聲音覆蓋嘅表面面積。

LSPX-S2 支援無線藍牙連接，用可以透過智能手機或者支援藍牙嘅播放器配對播放 SBC、AAC 及高音質 LDAC。同時喇叭仲有「一按和播放」功能，用家只要輕按喇叭上嘅按鈕，就可以透過 Spotify Connect 串流播歌，唔需要經過手機連接。如果用 Wi-Fi 連接的話，仲可以兼容10個 LSPX-S2 等 Sony 音響裝置。

Sony 嘅第二代玻璃共振無線喇叭 LSPX-S2 能夠提供8小時電池續航時間，預計今年7月中旬於香港推出，售價為港幣$3,890。

另外，Sony 同場推出 EXTRA BASS 重低音無線藍牙喇叭 SRS-XB32 及 SRS-XB22，兩個喇叭都具備 IP67 防塵防水規格，而且仲有獨家燈光、音效互動設計及 Party Chain 喇叭串聯功能。

SRS-XB32 及 SRS-XB22 都係適合戶外使用嘅無線藍牙喇叭，除咗有 IP67 防塵防水外，仲可以飄浮於水面，而且完全防水及海水鏽蝕，非常適合夏天拎去船P、沙灘用。

Sony 嘅 SRS-XB32、XB22 分別配備 48mm 及42mm 雙喇叭全音域單體，可以透過數碼訊號處理技術(DSP)技術輸出強勁重低音及清晰人聲。而兩款喇叭新加入嘅「LIVE SOUND模式」，只要一啟動就可以更加突出人聲、樂器表現，並均衡輸出背景音效，令用家有被強勁音樂包圍嘅感受。

Sony 嘅 EXTRA BASS 無線喇叭 SRS-XB32 及 SRS-XB22 將於今年6月中旬喺香港推出，售價分別為港幣$1,199及港幣$849。