飛機有 Auto Pilot (自動駕駛)相信唔少人都知道，不過大型民航機要自動完成降落就要透過機場電波協助，而小型飛機降落嘅細機場因缺乏設備就無辦法完成自動降落喇！但嚟自德國慕尼黑技術大學嘅研究人員，就利用咗 Machine Learning 技術應用於飛機上，令飛機好似自動駕汽車咁完全自動降落。

德國慕尼黑技術大學 (Technische Universität München)早前成功研究出，利用 Machine Learning 配合 GPS 導航、可見光及紅外線攝影機造出嘅自動降落系統。其實一般民航機喺大型機場都可以借助大型機場地面無線電信號嘅儀表著陸系統 (ILS)自動降落，而德國學者所研究嘅系統可以完全唔依賴地面系統情況下令飛機著陸。

德國慕尼黑技術大學團隊喺示範片段中都顯示，機師 Thomas Wimmer 駕駛單座飛機 Diamond DA42 時，全程將手放喺膝蓋上，完全唔需要手動操控。

機師 Thomas Wimmer 指出，系統喺距離機場好遠嘅地方已經認出飛機跑道，並完全自動引領飛機精確降落於跑道中心線上。不過目前相關技術仍然處於試驗階段，仲未達到可以廣泛推廣及測試水平，不過對未來航空業發展都係好事，萬一駕駛單座飛機嘅機師喺空中出現狀況都可以利用自動駕駛協助降落。

來源： Engadget