一本說明書竟然賣到$10000美金？能夠有咁高叫價相信世上無幾多產品做得到，而 Apple 嘅產品係其中一個！早於1976年，Apple 發布咗第一款電腦 Apple I，產量只有200部，近年最高成交價更達到了$90.5萬美金。而日前波士頓RR拍賣網站上，出現咗獨立拍賣嘅 Apple I 說明書，最新一次出價為$9,422美金，成交價有望超過$10000美金！

Apple 聯合創始人Steve Jobs 及 Steve Wozniak 喺1976年間，花咗10個月時間生產出 Apple 第一款電腦 Apple I，產量只有200部，並售出咗175部，亦令 Apple I 成為非常有價值嘅電子產品。今次喺波士頓RR拍賣網站上拍賣嘅正正係呢部極具收藏價值 Apple I 嘅說明書，佢除咗封面有 Apple 最早嘅 Logo 外，仲解釋咗如何設置、使用 Apple I 及其顯示器，並包括電腦系統摺疊示意圖。

RR拍賣行執行副總裁 Bobby Livingston 指出，目前已知嘅 Apple I 說明存在世上數量極為有限，大約只有65本左右，亦令呢本說明書成為世界上最有價值、最成功公司嘅極有意義收藏品。呢本 Apple I 說明書保存「狀態非常好」，封面有較淡嘅不規則網格狀印記，邊緣有一條短小裂縫，封面內部有一個輕微嘅圓形污點。

另外，呢本說明書仲有提供畀潛在買家嘅訊息：「我真唔想將佢賣出，因為呢本說明書係上帝賦予嘅禮物。我唔係一個貪婪嘅人，已經擁有咗佢近20年，比我兩段婚姻加起嚟都要長，期間我喺加利福尼亞州搬咗5、6次屋。而我擁有呢件美麗手工製品嘅日子已經到咗盡頭，而家將火炬傳遞畀你。」

來源：MacRumors