任天堂終於發布新版 Switch，呢部名為「Switch Lite」嘅手提遊戲機外型設計與 Switch 非常相似，但就刪減咗唔少功能，不過定價亦比 Switch 平咗唔少。其中 Switch Lite 採用一體化設計，取消咗分離 Joy-Con 控制器功能，令玩家需要額外買 Joy-Con 先可以玩部分遊戲，而遊戲機預計於9月20日推出。

其實早於今年3月，華爾街日報 (The Wall Street Journal)已經有報道指，任天堂正會喺E3遊戲展發布兩款新Switch遊戲主機，其中一款為針對休閒玩家嘅平價版，佢省略咗震動功能，Joy-Con控制器亦唔能夠拆卸，相信報道所講就係呢部 Switch Lite 喇！

由於 Switch Lite 係為玩家外出使用而設計，所以電池續航力都比原版 Switch 高少少，續航力達 3-7小時。而為咗令 Switch Lite 更輕便，任天堂將 Switch Lite 螢幕由原來嘅6.2吋縮小至5.5吋，解像度則同樣係720p，而重量就由 Switch 398 g 降至 275 g。

Switch Lite 除咗取消咗可分離 Joy-Con 設計及震動功能，亦無咗紅外線感應，同時移除咗原版 Switch 嘅迷你支架，輸出至電視功能亦被刪減。Switch Lite 售價為港幣$1,490，提供黃、灰及綠松色3種配色選擇，並於9月20日推出。

另外，Switch Lite 嘅 Pokemon 蒼響／藏瑪然特版本預計於11月推出，售價與標準版相同，不過機身會有蒼響及藏瑪然特彩繪及主題配色。