知名Apple產品分析師郭明錤最近頻頻推出新 iPhone 預測，不過佢郭明錤早前曾經預測 Apple 明年推出嘅3款新 iPhone 中，只有兩部支援 5G 網絡。不過，日前郭明錤就對自己嘅預測作出修改，並估計 Apple 將會於2020年推出3款支援 5G 網絡嘅新 iPhone。

根據郭明錤嘅分析指出，Apple 喺收購 Intel Modem 晶片業務後，可以有更多資源開發 5G iPhone；加上預計明年支援 5G 嘅 Android 手機售價至明年下半年可降至約$249至349美元，所以售價更高嘅 iPhone 唯有支援 5G，先可以爭取運營商補貼及消費者購買意欲，並且 5G 可以加速 Apple 發展 AR 生態。

郭明錤認為，Apple 為咗滿足美國市場需求，明年下半年將會推出嘅3款新 5G iPhone 都將會支援 mmWave 及 Sub-6GHz。不過郭明錤估計 Apple 如推出只支援 Sub-6GHz 5G iPhone，都係因為要針對中國呢啲只支援 Sub-6GHz 嘅市場，並可以用較低成本及售價爭取市場佔有率。

來源：9to5Mac