近年無人機發展非常迅速， 外國已經開始有無人機送貨服務，但載人無人機就暫時仲未面世，不過日前日本電氣 (NEC) 就對外公開載人無人機嘅升空示範。NEC 嘅無人機重達 150 kg，預計 NEC 會於2026年開始量產，以改善日本交通擠塞情況。

昨日 NEC 於日本千葉縣我孫子市 (Abiko) 基地中，公開大型載人無人機試製機，期間無人機垂直起飛進行升空示範，測試時機上並無載人，於3米左右高度懸浮約1分鐘，然後降落地面。據 Bloomberg 報道指，今次係首次有日本大型企業公開進行同類示範，NEC 合作夥伴 Cartivator 透露指，NEC 目標於2026年開始量產相關產品，為改善改善交通擠塞情況，而 NEC 會提供位置資訊、通訊基建等必要技術。

今次 NEC 展示大型載人無人機係由電池驅動，體積為 3.9m x 3.7m x 1.3m，重達 150 kg，外型與一般細小無人機相似，裝有4個螺旋槳。不過 NEC 並非唯一嘅載人無人機製造商，Uber 早前亦推出咗「Uber Air」空中的士計劃，預計於2023年推出商用空中的士服務。

來源：Engadget