捽得起！人人做DJ！

文：MenClub Patrick　　圖：MenClub
POSTED ON 19 Jan 2015

不論你是否clubbing活躍分子，係咪真係喜愛夜蒲，平日或多或少總會有機會接觸到club music。試想吓，去到呢啲場合，當其他男士「站着如嘍囉」嘅時候，若然你有一技傍身，化身DJ走埋部捽碟機捽番幾吓，咩呀？型囉！Come on，都唔一定係為溝女嘅，作為男士，識多樣嘢冇壞啫！其實，做DJ嘅門檻並唔高，坊間有唔少DJ學校開班教人打碟，一般人上10堂8堂就能掌握DJ基本功。今次筆者就請到來自法國嘅DJ Samir，隔空同大家上一堂入門DJ堂。
DJ Samir DJ Samir捽碟示範
1. 概念篇學做DJ，第一件事梗係要明白DJ嘅作用係乜先啦！當然唔係某啲場咁，專登搵啲Bikini女嚟捽碟引人望引人講啦！DJ Samir話，DJ嘅責任就係為會場提供音樂，必須令音樂保持non-stop，而除咗打碟選歌之外，DJ最經常做嘅兩件事，就係Mixing同Scratching。
2. 器材篇一眼睇晒，DJ Samir話唔接駁大型音響的話，DJ用上面張相嘅器材已經足夠做到需要做嘅事，基本上有一部連埋兩個碟盤嘅DJ Controller，再連接番電腦就搞掂，頂多駁埋喇叭同耳機。電腦需安裝DJ軟件，用嚟管理同播放歌曲。DJ Samir講，雖然近年興番聽黑膠碟，但暫時仍然冇乜DJ捽黑膠，至於唔係駁電腦、而係自己播埋歌嘅Controller，亦一早被淘汰咗。而對應電腦嘅Controller，DJ Samir推介佢用緊嘅Pioneer DDJ‑SX畀初學者，佢話因為學識咗用呢部Controller，就識得用多數其他機。 DJ Samir用開呢套名為「Serato DJ」嘅軟件。選用耳機方面，DJ Samir認為除咗低音要夠強，而且能夠畀佢監聽到歌聲中嘅細節，佢就揀咗用呢款V-MODA M-100。另外，耳機機身夠輕便、易戴易除兼有彈性都好重要，事關佢經常會咁樣戴單邊。
3. Mixing篇 DJ Samir解釋，DJ開始播音樂之後，第一件事就係做Mixing（混音）。電腦嘅DJ軟件，會一直同時間播住兩首歌，再輸入到DJ Controller；兩個碟盤同周圍啲掣，各自負責處理一首歌，而中間勁多掣嘅mixer，就係用嚟將兩首歌混埋一齊。唔好畀咁多掣嚇親，DJ Samir話其實最常用嘅掣得以下幾個。
Fader－調校左右track兩首歌嘅總音量，此消彼長，一首歌校大咗聲，另一首就會變細聲，校到最盡直頭會有一首歌冇聲。
BPM（Beat Per Minute）－即係調校音樂每分鐘嘅節拍，令首歌變快或變慢，亦能間接改變埋音調高低。
EQ－等如一般player嘅等化器（Equalizer），能夠對歌曲嘅高、中、低音進行調校，以達到DJ想要嘅效果。
4. Scratching篇熟習咗Mixing之後，DJ Samir話如果想歌曲更生動特別，就可以玩埋Scratching，即係成日講嘅捽碟，主要係靠做以下兩個動作去製造額外音效。
捽碟盤－大家最常見搵手指將個碟盤捽前捽後，從而發出特殊effect。捽嗰陣，被捽嗰邊track播唔到歌，純粹用音效嚟配襯另一邊track首歌。
㩒PAD掣－通常碟盤上或下方都有8大粒PAD掣，一㩒即會發出特別聲音。
5. 技術篇 DJ Samir透露，Mixing同Scratching雖然可以玩到千變萬化，但其實基本步驟係萬變不離其宗。入門第一步，係要為歌曲搵cue點，即係樂句每個循環嘅第一拍，搵到cue點之後，再跟住樂句嘅拍數嚟數，就會搵到應該做Mixing同Scratching嘅位置。 Pioneer DDJ‑SX DJ Controller
聽完以上DJ基本功之後，我不禁問，真係要學晒全套玩法嘅話，到底難唔難？DJ Samir就幾有信心咁答，一般人就算由完全唔識開始，通常10堂之內（每堂1粒鐘），都學得識晒全套技術，只要之後繼續練習，就能夠做到DJ。咁其實做DJ最緊要係咩呢？佢就答最緊要係有音樂感同節奏感，欠缺嘅話確實難上手啲，不過佢又話，對做DJ有興趣而搵佢教嘅人，通常呢兩方面都唔會太差。Gentlemen，有冇興趣學吓呀？早排DJ Samir（左三）為本地大專生DJ比賽「U23 DJ League」擔任導師。佢話班學生由零開始學咗10堂，再加上自己練習，落到Club比賽嗰陣，表現已經幾似模似樣。
課程查詢：DJ Academy HK　djacademy-hk.com