{ SKIP }
文:MenClub Patrick  圖:MenClub
POSTED ON 18 Feb 2015
愈來愈多Gentlemen對音響有要求,不會再隨隨便便駁個電腦喇叭,或直接在player插個耳機聽歌就算,至少都會加個Amp去推一推。但係件件器材都要擴音的話,不少人又會頭痛蝸居點嚟咁多位放器材,所以Creative這部多功能擴音機Sound Blaster X7,正正係為解決這個難題而推出。事關它不止機身夠細,更重要係玩法夠多,差不多大家數得出的訊源它都支援,一部機近乎可幫晒全屋器材擴音,玩晒!


三角形機身的的骰骰,一隻手拎得起!



USB、藍牙、光纖、RCA通殺
X7多玩法成點?睇睇它的input及ouput就知!最主打係機側有一個USB插頭,電腦、手機、tablet等等數碼裝置,全部可經USB輸入歌曲到X7;不想駁線的話,甚至靠藍牙無線傳輸歌曲過去亦得。



想簡單啲用藍牙連接手機同X7?喺機側印NFC logo個位拍一拍咪得囉。



跟住它仲有RCA插頭(紅白線)的Line-In,電視機等家庭影音器材都可以用這種較為傳統的輸入方式連接X7。另外,X7還有光纖輸入,CD機、影碟機、手提播放機、甚至PS4及Xbox One,都可經光纖輸入較高質素的音訊,即係話X7除了可用來聽歌,直頭連電影及打機音效都能夠放大,用途夠多喇啩?


光纖in & out、RCA in & out、2個3.5mm Line-Out同Speaker Out都設於機背。



對應5.1聲道
輸出方面亦都唔弱,3.5mm及6.3mm耳機插頭固然要有,X7亦設有RCA Line-Out及兩個分別屬於中置及後置喇叭的3.5mm輸出插頭。點解會有?因為X7能夠對應5.1聲道,雖然它並沒有5.1輸出插頭,卻同樣可靠這兩個3.5mm頭,將放大了的影碟音效輸出到5.1聲道喇叭,縱使效果會比真正5.1 Amp遜色,但有點都好過冇。



機面除有Mic、6.3及3.5mm耳機插頭外,上面還有電源及藍牙、Dolby Digital及SBX Pro Studio功能開關掣。



駁書架喇叭變Hi-Fi
更重要的一點,是X7的機背還具備傳統的喇叭輸出端子,能夠接駁一般的被動式書架喇叭,配合X7最高50W+50W的輸出功率,接駁電腦或手機之類播歌時,便能化身一套小型Hi-Fi。另外,X7還有一個光纖輸出插頭,可經它再駁另一部擴音機或其他器材,實行更高階的玩法。



最主要的USB插頭設於機側。



內置24-bit/192kHz DAC
擴音機玩法夠多當然好,但更重要應該係擴音質素。X7除了能提供合共100W的輸出功率外,推動耳機時,亦有600Ω的輸出效果,基本上已夠力推任何頂班耳機。而且它本身已內置了DAC(Digital to Analog Converter)解碼器,最高支援24-bit/192kHz格式,確保為這類高質歌曲擴音時,能保持原有的清晰度,再加上它也可讓用家自行更換Op-Amp晶片去轉換音色,似足耳擴咁多嘢玩。



打開機底的蓋,就會見到Op-Amp晶片,更換好容易。



「電腦底」功能
提起Creative,大家最熟悉應該係它的電腦聲效卡,其實X7都具有不少音效卡功能,包括支援Dolby Digital、EAX 5.0等音效系統,從而優化電影及打機音效。它亦設有SBX Pro Studio功能,啟用後音場會變得更寬闊,增強聲音的定位與包圍感,睇戲或打機時最好使用這功能。此外,用家還可透過《Sound Blaster X7 Control》程式,在電腦或智能裝置上遙控X7或為它調校音色,即使X7已晉身音響器材之列,但功能仍然有點「電腦底」。



不想走近X7才能調節音量的話,也能以《Sound Blaster X7 Control》程式遙控。



筆者實試過,覺得經X7放大的歌曲,清晰度頗不錯,雖然聲音仍然帶有少許機械味道,始終不及傳統擴音機的音色溫暖圓潤,但以它$4,880的價位,又有咁多功能,收貨啦!相信若選
換音色更溫暖的Op-Amp晶片,效果會更佳。



隨機附送一個耳機架,裝在X7機背後就能夠掛上headphone。



Creative Sound Blaster X7規格
售價:$4,880
最高輸出功率:50W+50W
音效解碼:24-bit/96kHz(Analog to Digital)、24-bit/192kHz(Digital to Analog)
頻率響應:20Hz-90kHz
輸入:光纖(TOSLINK)、RCA、USB、藍牙(NFC)、Mic
輸出:3.5mm/6.3mm Headphone Jack、光纖(TOSLINK)、RCA、2x3.5mm Line-Out、Speaker Out
體積:128x148x159mm
查詢:Speed Digital 2958 1113





自Blue Origin及Virgin Galactic於過去兩年分別成功載人上太空後,「商業太空旅行」就由小說情節,成為現實中可行嘅體驗不過,當然係只限有錢人體驗啦。而睇黎有錢人已經唔滿足於「飛上去望下個地球就落返黎」,而係 ...
tech
【太空】真 ‧ 離地餐廳 400萬上太空 望住地球食米芝蓮
28 Mar 2024
若然消息屬實,iPhone 16 Pro機身側邊將加入一個全新按鍵「Capture button」,大小與電源鍵差唔多,能方便用戶拍攝及錄影。
tech
【科技】疑似iPhone 16 Pro保護殼曝光!機身側邊加入全新「拍攝」按鍵?
27 Mar 2024