Apple於香港時間今早舉行嘅發佈會公佈咗新Apple Watch及iPad Air，睇返網上評論以及Apple股價，似乎大家都唔多滿意。而呢個世界上仲有另一班人好唔滿意，就係串流音樂平台Spotify，佢哋喺Apple發佈會後一個鐘內就發表聲明，基本上就係同大家講「Apple大蝦細，搵人查下佢有冇違反反壟斷法好喎！」

Spotify嘅公告其實頗為簡短，就係話「Apple再一次利用佢主導地位、不公手法去欺壓對手、強逼用家使用佢哋自家產品」，所以呼籲有關機構「即刻行動，以限制Apple嘅壟斷行為」，如果唔係就會「對開發商社群造成無可挽救嘅傷害，以及威脅大家聆聽、學習、創造及聯繫嘅自由。」成篇嘢都冇講明究竟Apple做咗啲咩搞到Spotify咁嬲。

但其實睇返個發佈會，就會知道Apple新推出「Apple One」服務，即係令用家以一個價錢，一次過訂購Apple Music、Apple TV+、iCloud等多個Apple自家服務嘅優惠，目的好明顯係想用較平嘅價錢，吸引Apple用家由各個不同服務平台 (例如聽歌用Spotify、睇劇用Netflix) 轉用Apple自家服務，再講白啲呢，就即係黎搶Spotify、Netflix等平台嘅生意。難怪Spotify會不滿啦。

實際上，Spotify亦多次向Apple嘅「壟斷地位」表示不滿，上年亦曾向歐洲聯盟委員會 (European Commission)提出投訴，指App Store抽取30%分成係唔合理，其本質其實係同Epic Games近來與Apple嘅訴訟一致。