Apple於香港時間今日凌晨舉行名為「Hi, Speed」嘅發佈會，一如預料地公佈咗最新iPhone 12及iPhone 12 Pro系列，以下就為大家整理一下發佈會嘅內容。

iPhone 12 系列

今次發佈嘅iPhone全數支援5G Ultra Wideband、最高下載速度為4Gbps。設有Smart Data Mode，自動偵測你有冇需要用5G服務，冇就轉返用比較慳電嘅LTE (4G)，號稱支援全球絕大部份5G頻寬。

最先公佈嘅iPhone 12，外型一如預料重回iPhone 4年代嘅方邊設計，有黑白紅綠藍5色。配有6.1吋Mon Super Retina XDR螢幕，460ppi，表面為比其他玻璃堅硬四倍嘅Ceramic Shield。處理器為5nm製程嘅全新A14 Bionic晶片，入面有6核CPU、4核GPU，以及大副提升嘅機器學習能力。

背後為1200萬像素廣角鏡及1200萬像素超廣角鏡組合，亦有新嘅Smart HDR 3功能，新Night Mode亦能於前鏡頭及超廣角使用，仲可以拍Time Lapse片。機背就有新嘅MagSafe，簡單講就係有磁石嘅無線充電，除咗令對準無線充電更方便之外，亦可以痴其他配件如手機殼、卡片套上。

iPhone 12 Mini與舊iPhone對比圖

而iPhone 12 Mini就係細Mon版iPhone 12，所有機能一樣，就係個Mon變咗5.4吋。

新機機背就有新嘅MagSafe，簡單講就係有磁石嘅無線充電，除咗令對準無線充電更方便之外，亦可以痴其他配件如手機殼、卡片套上。另外手機版《League of Legends》正式命名為《League of Legends Wild Rift》，並正式登陸iOS。

iPhone 12 Mini售價為699美金 (HK$5,999)、iPhone 12則由799美金 (HK$6,799) 起。其中iPhone 12 今個星期五接受預訂，最快10月23日出貨。iPhone 12 Mini就11月6日接受預訂，11月13日出貨。

iPhone 12 Pro系列

iPhone 12 Pro系列採用光面不鏽鋼邊，有銀、黑、金、藍四色，邊框比上一代明顯薄好多。與iPhone 12一樣使用Mon Super Retina XDR螢幕，iPhone 12 Pro為6.1吋、iPhone 12 Pro Max為6.7吋。處理器亦同樣使用A14 Bionic晶片。

後鏡頭除咗1200萬像素廣角鏡、1200萬像素超廣角鏡組合再加個1200萬像素Telephoto鏡頭。亦可以拍攝Apple ProRAW格式，後製更加方便。拍片方面就支援Dolby Vision HDR，仲可以於iPhone內做埋後期。於iPad Pro中首現嘅LiDAR亦出現於iPhone 12 Pro系列中，除咗增強AR功能，亦能協助低光嘅照片及影片拍攝。

感覺上iPhone Pro系列主打超強勁嘅拍攝及後製功能，除非你好需要一個6.7吋大Mon，又或者非常著重拍攝效果，否則日常使用嘅似乎iPhone 12已經足夠。

iPhone 12 Pro售價為999美金 (HK$8,499)起、iPhone 12 Pro Max 則由1,099美金 (HK$9,399)起，兩者儲存容量都係128GB起跳。其中iPhone 12 Pro今個星期五接受預訂，最快10月23日出貨。iPhone 12 Pro Max就11月6日接受預訂，11月13日出貨。

目前iPhone整條產品線

Home Pod Mini

即係Home Pod嘅細粒版，主打靚聲及連結Siri及智能家居。比較特別嘅係可以用多個Home Pod Mini作對講機使用，於街外亦可以用iPhone直接以Home Pod Mini與家人對話。

售價99美金，11月6日接受預訂。