隨住NASA早前正式公佈「Artemis登月計劃」，雖然距離人類再次踏足月球都仲有段時間，但相關配套就已經進行得如火如荼。例如日前美國就與其他八個國家簽署「Artemis Accord (阿提密斯協議)」，以解決為未來月球探索、甚至長期逗留時可能會出現嘅國際糾紛。

圖片：NASA

目前有關太空探索嘅條約，就只有1966年提出嘅《外太空條約 (Outer Space Treaty)》，入面其中一條條文就係電影《Gravity》中提到過嘅，任何太空人遇上意外事故，應給予一切可能的援助」。但總共只有10條嘅《外太空條約》寫得相當含糊，而新嘅《阿提密斯協議》就更仔細地列出國家於進行太空探索任務時嘅責任及權利。例如列明於月球上採得嘅任可資訊都屬該國所有、保護月球上嘅歷史文物地點 (即係美國阿波羅任務嘅著陸點之類)、能建立其他國家不應干預嘅「安全區」等等。

圖片：NASA

目前簽署咗《阿提密斯協議》嘅國家有美國、英國、日本、澳洲、加拿大、意大利、盧森堡及阿聯酋。而另外兩個最有能力送人上太空嘅國家，俄羅斯及中國並不在此列。其中俄羅斯老早就講到明唔鍾意呢條條例，其太空任務主管Dmitry Rogozin更加指阿提密斯計劃本身就「太以美國為中心」。只於中國，NASA主管Jim Bridenstine就指：「如果中國能夠改變佢哋嘅行為，令到國會兩黨都覺得，『可以搵佢合作喎』，咁NASA就準備好同中國合作。但依家黎講，呢個選擇就唔存在，而NASA永遠都會跟規矩做嘢。」