早前美國藥廠輝瑞 (Pfizer) 宣佈疫苗臨床試驗成功率達90%，令抗疫現出曙光，而研發疫苗嘅BioNTech公司嘅兩位德國籍土耳其裔科學家夫婦亦被稱為「夢幻組合」。而其實佢哋本身唔係研發傳染病疫苗，而係研發抗癌藥物，更加係德國百大富豪之一，但即使事業及財富上取大極大成功，兩位依然保持謙遜之心。

Dr. Ugur Sahin及Dr. Ozlem Tureci嘅父母都係土耳其人，並且都喺二人年幼時舉家搬去德國定居。後來兩個人分別開始研究抗癌藥物，又因為咁而認識對方並且步入教堂——準確啲黎講係步出實驗室，因為據報佢哋當年結婚，係由個Lab除咗件實驗袍跑去註冊就算。2001年時，二人創立Ganymed製藥，並成功研發出癌症抗體，最後該公司以14億美金出售。

二人又再創立BioNTech，本來都係研究mRNA抗癌藥物，但當Dr. Sahin於一月時睇到武漢嘅新聞，就決定轉為研發mRNA疫苗，並組成一個500人嘅團隊開始研發，最後於3月與輝瑞達成合作協議。而自疫苗臨床試驗成功嘅消息傳出，BioNTech嘅市值曾經暴升到257.2億美金，比上年翻咗5倍有餘。

雖然身家再創新高，但Dr. Sahin及Dr. Tureci依然保留樸素生活，例如Dr.Sahin每日都係踩單車返工、第一間公司名為「Ganymed」係源自土耳其語中嘅「刻苦耐勞」。甚至當日前肺炎疫苗研發成功後，佢亦指「這是創新、科學及全球通力合作的結果」，並希望能夠為世界重拾常態，而非自我居功或者多謝國家多謝黨。

Dr.Sahin亦指，如果疫苗獲得生產批准，佢自己會第一時間接種，但更認為必須優先給予老人家、長期病患者及醫護人員。