早幾日同大家介紹過BMW研發嘅電動飛行推進器，如果你有仔細留意，會發現佢其實係BMW嘅「NEXTGen 2020」計劃，而「NEXTGen 2020」其實就係BMW對未來交通工具嘅展望。除咗個推進器之外呢，最新就公佈咗以下呢架外型非常吸引嘅「BMW Motorrad Definition CE 04」概念電動Scooter啦。

其實BMW自2014年起，就一直有研發電動Scooter，例如2017年就公佈過「BMW Motorrad Concep Link」，而「Definition CE 04」就係比「Concept Link」更貼緊現實嘅設計。車身修長而貼近地面，整體感覺有啲似一部有轆嘅水上電單車，而多稜角嘅設計亦加重未來都市感。而且因為電池平放於車底，再加上體積細小嘅動力系統，車底能夠空出一個由側邊打開嘅儲物或頭盔空間。另外車頭亦有個10.25吋螢幕取代儀錶板。

特別值得一提嘅係，啲相入面個人著緊嘅嗰件白色褸同個頭盔都係BMW特登設計，防水透氣之餘仲內置可變色嘅燈條，內袋甚至可以用黎幫電話差電——當然呢一切，包括架車，目前都只係概念階段，但又不得不讚BMW畫咗個幾吸引嘅願景出黎。