最近英國科技公司「Zelp」為咗減少畜牧業溫室氣體排放，推出一種比牛戴嘅「牛口罩」，希望能夠有效減少牛打「思嗌」（打嗝）所排放嘅甲烷。皆因牛消化系統同人唔一樣，會係消化過程中產生甲烷，再經過打「思嗌」同放屁釋出。

（圖片截至：zelp.co）

就咁聽落好似無傷大雅，放屁同打「思嗌」就算人都會啦，問題在於無色無味但對地球非常有害嘅甲烷。據外媒報導顯示，甲烷係比二氧化碳更為危險嘅溫室氣體，對全球變暖影響大約係二氧化碳84倍。現時全球大約有16億隻牛，每日係到放下屁打下「思嗌」，每年碳排放量就同飛機、汽車不相伯仲。

（圖片截至：zelp.co）

由於牛所排放嘅甲烷有95%嚟至鼻孔同嘴，所以科技公司Zelp發明咗「牛口罩」，聲稱能夠舒適貼合牛頭上（牛牛應該點都唔想戴住嚿嘢）。口罩前端設有感應器監測牛呼氣「甲烷」濃度，當濃度過高時，口罩就會吸收牛所呼出嘅氣體，通過口罩內催化器將「甲烷」轉化為二氧化碳同水。Zelp嘅CEO「Francisco Norris」表示「牛口罩」能夠將甲烷引起嘅溫室效應降低至原來嘅1.5%甚至更少。除咗減少甲烷排放，口罩仲有唔少對飼養人好有幫助嘅功能，例如GPS追蹤、疾病檢測等。

（「牛口罩」功能一覽。 圖片截至：zelp.co）

資料來源：WIRED、Zelp