電腦、平板、手提遊戲機，理論上係三樣唔同嘅產品，但隨住近年Laptop可以拆個芒出黎做平板、平板又可以加個鍵盤變Laptop，而且電腦、平板都可以打機，實際上三種產品已經越黎越相似。既然咁似，不如就撈埋佢做一件產品。Lenovo 宣佈會於CES 2021發佈嘅NEC Lavie Mini，就係集三者於一身啦。

圖片：Lenovo

NEC Lavie Mini嘅「本體」，其實係個8吋大小、1900 x 1200解像度嘅螢幕，再配上11代Intel Core i7處理器、16GB記憶體、256GB M.2 SSD，齋用佢嘅時候就等如一部行Windows嘅平板。特別之處在於佢有一系列嘅配件，例如有個頗為可愛嘅圓形按鍵鍵盤畀你當電腦用，又有個擴展台座用黎連接電視或者大螢幕播4K/60fps片，如果加上兩個好似Nintendo Switch Joy Con嘅遊戲控制器，就會變咗部手提遊戲機 (都係行Windows)。一機三用聽落去的確係幾完美，實際用落好唔好，幾時出、售價又係幾多，就要等到CES 2021先知啦。