最近一款新興社交App「Clubhouse」熱潮吹到嚟香港，國外唔少名人都有玩呢個App，尋日Elon Musk更係Clubhouse「開房」邀請大家一齊吹水。隨著個App爆紅，網上愈嚟愈多人求「朋友」畀「邀請碼」加入，啱啱上ebay睇咗一睇，「邀請碼」賣到200蚊港幣一條仍然有價有市，究竟Clubhouse係乜東東？

https://t.co/XcCoKOjYlt

— Elon Musk (@elonmusk) January 31, 2021

Clubhouse係一個以聲音為主嘅社交平台，入面無得Send圖或文字，只可以講野，而且實行「邀請制」，需要已經Join咗嘅人比邀請碼先可以開戶，由於每個用戶只有兩次邀請機會，所以邀請碼非常珍貴。用家可以係入面開間房同人吹水，鍾意開私人房圍內傾又得，開間公開房等人入嚟吹水又得。如果怕羞唔敢講野，又可以只Join人哋啲房靜靜雞聽下佢哋講緊啲咩。現時Clubhouse只有喺Apple App Store上架，Android用家要等下啦。

（圖片截至：Apple App Store）

就咁聽落好似只係一個有得Phone-in嘅Podcast，現時坊間大把App都可以做到，甚至比Clubhouse仲多功能。但可能正因為邀請碼制度同只得語音，捉到用戶「唔執輸」心理，加上大量名人加入，促使Clubhouse成功。只有聲音反而有啲反璞歸真，好似返去細個「煲電話粥」年代，幾個朋友用屋企電話駁上駁上駁，幾十個人一齊吹水，而且又可以邊吹水邊做其他野，唔使驚要睇下佢哋有冇Send咩圖或link（因為冇得Send），彷彿開緊一場大型電話會議。