Goolge母公司Alphabet嘅X實驗室（X Lab）一向都研究唔少新奇前沿科技，例如無人駕駛汽車、4G網絡熱氣球、智能隱形眼鏡等，著名嘅Google Glass最初就係出自該實驗室。據外媒BusinessInsider報導，有消息指X實驗室正研究一種可以令人類擁有超級聽力嘅裝置，計劃代號為「Wolverine（狼人）」。

研究團隊向Marvel致敬，將計劃代號名為「Wolverine」。

你無睇錯，代號同Marvel嘅「Wolverine（狼人）」一樣（睇嚟研究團隊都係Marvel粉絲），不過計劃並唔係研究自癒再生能力，而係超級聽力。外媒BusinessInsider引述四位前X實驗員工消息，該計劃從2018年開始進行，正開發一種可以戴係耳仔上並裝有唔同感應器嘅裝置，從而令用家可以喺嘈雜環境下，隔離出唔同聲音，專注聽某個人說話。

唔知「Wolverine」有無機會整到好似無線耳機咁細粒呢。

據了解，研究團隊已經歷多次嘗試，從早期全覆蓋耳仔版本，改良到只從耳仔上方伸出一舊野，目前遇到嘅最大難題，在於點樣將多個麥克風安放喺裝置入面。報導亦提到，開發團隊已經搵咗助聽器公司Starkey Hearing Technologies及Eargo多位人材加入，期望成品能夠提供多項服務，或針對唔同用途推出各種型號，藉此建立成功商業模式。