近來香港迎來一場「193對153」嘅電視發展隔空辨論，實際上其實就係大家對於年輕人睇電視嘅口味有不同理解 (邊個啱大家心裏有數啦下)。但根據一個研究指出，年輕人其實根本唔多睇電視！即係大家拗黎都冇用，打和！

德勤日前發表「2021電子媒體趨勢調查」，主要係睇美國不同年齡層對於電視、網絡、社交網站等媒體嘅使用習慣。結果就發現，只有10%Z世代 (14-24歲)會以「睇電視」為娛樂活動，比起打機 (26%)、聽歌 (14%)、上網 (12%)及用社交網站 (11%)都要低，換言之班真正嘅「後生仔」根本就唔多睇電視！

值得留意嘅係「千禧世代 (即係八、九十後)」、「X世代 (六、七十後)」及「嬰兒潮世代 (四、五十後)」睇電視嘅比率分別係18%、29%及39%，全部都係該世代中最受歡迎嘅娛樂活動。

圖片：Deloitte Media Trends survey, 15th Edition

調查中另一個發現係，有一半「Z世代」會選擇以社交網站作為接受新聞資訊嘅主要渠道，會睇電視新聞嘅人只有12%；另一邊廂「嬰兒潮」世代就只有8%會透過社交網站接受新聞資訊，睇電視嘅人有58%。

雖然個研究係針對美國人口，但放返黎香港似乎講得通——當你班觀眾個個都七老八十，咁你搵班五十幾歲嘅人黎又的確係「年青人偶像」呀？

研究中另一個發現係，當年估計「千禧世代」長大後嘅行為會跟隨「X世代」及「嬰兒潮世代」，變成大部份人都係睇電視為主，但事實上即使睇電視依然係最受「千禧世代」歡迎嘅娛樂活動，其佔比相較「X世代」及「嬰兒潮世代」就要少得多。換言之世代嘅行為唔會因為年齡而改變。再推論落去就係依家十幾二十歲嘅「Z世代」唔睇電視，再過十年佢哋都係唔會睇電視。咁以步入人生暮年嘅觀眾為主嘅「大台」，過多幾年仲有咩人睇呢？