近年多個沿海國家都積極提升離岸風力發電比率，但往往都要喺海上興建N座風機先可能提供足夠發電量，無論建造成本定係保養都係一筆唔少嘅費用。最近挪威新創公司Wind Catching Systems（WCS）就推出一種全新技術，打算喺海上興建多座300米高嘅浮動式「捕風網（Windcatcher）」，發電效率係傳統風機嘅5倍。

Windcatcher比例圖。（圖片截自：WCS）

據了解，Windcatcher將會效法於現有嘅海上鑽油台工藝，興建出一個浮動海上平台，並喺上面架設多部大小不一嘅風機組成一個龐大捕風網陣列。當風速太大嗰陣，陣列上嘅大型風機可以透過傾斜角度保護機身降低發電量，而小型風機則繼續保持運作，唔使好似傳統風機咁一大風就要完全停轉。WCS表示Windcatcher發電效率會比起傳統風機高出5倍，每個陣列發電量能滿足8萬戶歐洲家庭。

Windcatcher概念圖。（圖片截自：WCS）

除咗發電效率高之外，亦因為Windcatcher由多個部件組成，所以只要興建好平台後，大部份維修及安全工作都可以直接喺甲板上完成，大大降低興建及維護成本。另外，WCS預計Windcatcher使用壽命為50年，比起傳統大型風機嘅30年壽命多出差唔多成倍，總之就係一個字「抵」。

目前WCS已獲得North Energy及Ferd資助，並與離岸風力發電供應商Aibel及IFE Institute for Energy Technology合作，有望今年完成技術驗證，並喺2022-2023年提供商業開發解決方案，希望可以冇補貼嘅情況下，都可以產出具競爭力嘅電力。

資料來源：newatlas、WCS