{ SKIP }
文:MenClub 艾力克  圖:互聯網
POSTED ON 10 Jun 2021

對於各位網絡成癮嘅朋友,搭長途機最大煩惱莫過於冇得上網,即使部機有Wi-Fi提供,但一見到個價錢就心諗不如瞓覺算數。近日SpaceX 「Starlink(星鏈)」項目副總裁Johnathan Hofeller表示,目前正與多間航空公司洽商,打算用Starlink為飛機提供網絡服務,正式加入機上Wi-Fi競爭,意味著將來除咗有更快嘅上網速度,亦可能因為SpaceX嘅加入而壓低價格,平價機上Wi-Fi指日可待。

Starlink衛星網絡概念圖。

早喺2015年,SpaceX創辦人Elon Musk就計劃發射4,400枚Starlink衛星組成一個覆蓋全球嘅衛星互聯網系統,為偏遠地區家庭提供互聯網服務,並承諾將會提供至少100Mbps下載及20Mbps上傳速度。目前計劃已發射近1,800枚衛星以及陸續開放畀多地市民享用,用戶只需用499美元買一組專用嘅接收天線同路由器,就可以以每月99美元享用上網服務,有部分用戶更錄得超過200Mbps下載速度,遠超SpaceX先前所定下嘅承諾,所以唔少人都睇好Starlink會為大眾提供一個全新嘅互聯網服務選擇。

Starlink家用接收天線。

正如第一段所講,Starlink除咗可以提供家用網絡服務,最近就打算為飛機提供埋網絡服務。查實喺上年年底SpaceX就已經向美國聯邦通訊委員會(FCC)提出申請,將於今年年底用5部商用客機測試Starlink網絡服務,FFC喺幾個月前都同意咗將Starlink列入移動運載工具(e.g飛機、船、汽車等等)網絡服務供應商之一,可見SpaceX一早就部署好打入機上Wi-Fi市場。

Starlink項目副總裁Johnathan Hofeller。

Johnathan Hofeller就表示,飛機用嘅Starlink收發設備,技術上同現時家用嘅設備差唔多,只需要就飛機識移動呢個問題作出調整,例如當飛機飛到到海上嘅時候,因為冇地面發射站可以傳輸訊號,所以要用上「Inter-Satellite Connectivity」技術,即衛星之間透過激光鏈路互相通信,無須透過地面站反射,而一下代嘅Starlink將會全面用上呢種技術,確保機上網絡暢通無阻,不過就未知上網速度有冇現時嘅家用版Starlink咁快。

Starlink衛星網絡概念圖。

現時網上Wi-Fi市場競爭激烈,陸續有多間航公司加入競爭,當中就有Elon Musk嘅競爭對手Amazon,打算發射3,000枚低軌道衛星,不過佢依加一枚都未發射過(所以咪被Elon Musk笑),另外亦有已經發射182枚低軌道衛星嘅英國公司OneWeb,而現有網上Wi-Fi服務商,美國嘅IntelSat同ViaSat都打算加入競爭。不過Johnathan Hofeller就好大口氣咁話,有信心SpaceX會喺競爭當中勝出。其實對於一般消費者嚟講,邊間公司爭贏或者唔係太重要,愈多公司競爭,就代表著呢個領域會發展得更快,到時最大贏家就係一眾市民,或者大家唔使好耐就可以享用平價兼高速機上Wi-Fi服務。

資料來源:theverge

自Blue Origin及Virgin Galactic於過去兩年分別成功載人上太空後,「商業太空旅行」就由小說情節,成為現實中可行嘅體驗不過,當然係只限有錢人體驗啦。而睇黎有錢人已經唔滿足於「飛上去望下個地球就落返黎」,而係 ...
tech
【太空】真 ‧ 離地餐廳 400萬上太空 望住地球食米芝蓮
28 Mar 2024
若然消息屬實,iPhone 16 Pro機身側邊將加入一個全新按鍵「Capture button」,大小與電源鍵差唔多,能方便用戶拍攝及錄影。
tech
【科技】疑似iPhone 16 Pro保護殼曝光!機身側邊加入全新「拍攝」按鍵?
27 Mar 2024