自Elon Musk於2015年宣布推出「Starlink」開始，呢項全球衛星網絡服務就一直備受關注，唔少住喺偏遠地區嘅居民都希望快啲正式推出。有賴於SpaceX近年密密射衛星上太空，目前已部署好1,737枚Starlink衛星，近日SpaceX總裁Gwynne Shotwel就表示，預計今年9月左右可以持續覆蓋全球，接住落嚟嘅工作就係走訪每一個國家取得電訊服務供應權。唔知香港第時有冇份呢？相信唔少住村屋嘅朋友都飽受低網速折磨，轉用Starlink可能係另一條出路。

Starlink衛星覆蓋概念圖。

目前Starlink計劃已經陸續喺全球11個國家展開測試，用戶只需用499美元買一組專用嘅接收天線同路由器，就能夠以每月99美元享用衛星上網服務。至於網速方面，SpaceX承諾提供至少100Mbps下載及20Mbps上傳速度，有德國用戶更錄得超過500Mbps下載速度，當然實際網速會受到當地衛星覆蓋數目以及天氣因素影響，不過對於冇有線上網服務嘅人嚟講，呢個速度已經夠晒。

有德國用戶錄得超過500Mbps下載速度。

Starlink家用接收天線。

資料來源：reuters、wccftech