隨住iPhone 13發表日子將近，最近網上又開始瘋傳新機情報，近日有位微博博主就貼出多張聲稱係iPhone 13模型機嘅相，並表示有人喺富士康見過一模一樣嘅模型。若然屬實，似乎新機外觀變化不大，只不過係螢幕「劉海」縮細咗，同埋後置鏡頭模組變大咗，至於有冇傳聞中嘅屏下指紋解鎖功能，齋睇相就無從判斷。如果新機真係好似相中咁改少少就拎出嚟賣，大家又會唔會跳過呢一代iPhone呢？

從相中可以見到，基本版iPhone 13同樣採用雙鏡後置鏡頭設計，不過個鏡頭就唔係好似iPhone 12垂直咁擺，而係對角咁擺。至於iPhone 13 Pro就一樣係三鏡頭設計，但整個鏡頭模組就比iPhone 12大咗啲啲。正面睇嘅話，就會見到iPhone 13系列螢幕「劉海」確實有所收窄，從而提升螢幕佔比。

先前就有傳聞指iPhone 13系列主鏡頭將會有大改進，而「Pro」機型更會搭載升級版超廣角鏡頭，f/1.8大光圈、6杖鏡片組，並有自動對焦功能，亦有傳聞指所有iPhone 13機型都會有升級版嘅超廣角鏡頭，可能就係用咗新廣角鏡，所以喺相入面見到鏡頭模組變大咗。雖然只係諜照，未必係真正嘅iPhone 13，但至少睇完叫做有個心理準備，就算Apple真係改少少就拎出嚟賣都唔會太過失望。預計iPhone 13將於今年秋季正式發布，到時就知道Apple有冇誠意啦！

資料來源：macrumors