科幻電影中常見嘅題材係隕石撞地球，而解決辦法無非就係搵嘢炸咗佢。而中國官方團隊最近就係計掂數，只要用23支長征5號火箭同時撞落粒隕石到，就可以改變其方向拯救地球！

中國長征5號火箭

據《路透社》報導，中國科學家計過數之後認為，以太陽系內最有機會撞擊地球、平均直徑492米嘅小行星「貝努」為假想目標，只要於適當位置將23支目前中國最大型嘅長征5號火箭同時撞落去，就能夠將其路徑推開1.4倍地球直徑，簡單啲黎講就即係能夠將貝努由「命中地球正中心」變成「擦身而過」。

電影《末日救未來》截圖

除咗中國之外，美國亦有研究緊同類計劃。2018年時美國NASA曾同樣提出火箭撞擊方案，需要用75支三角洲4號火箭，而且預警時間雖然25年 (即係要喺粒小行星撞擊地球前25年發現佢先夠時間作出反應)，相對之下中國提出嘅火案需要少啲火箭、預警時間亦只有十年。

另一邊廂，當中國方面仲停留喺理論階段，美國NASA就準備於2022年初前，發射無人駕駛太空船嘗試攔截 (簡單黎講就即係撞落去) 兩粒與地球距離夠近嘅小行星，去測試對小行星軌跡嘅影響。如果成功，將係人類首次成功改變天體軌跡。

資料來源：路透社