雖然歌仔都有得唱「屎我係一督屎...命比蟻便宜...」，但其實糞便都可以變黃金！最近有韓國大學發明咗一款環保馬桶，將排泄物轉化成能源為建築物供電。而且用家如廁後更可獲得一種叫「Ggool」嘅虛擬貨幣，用嚟買書、咖啡、公仔麵同水果等等。

圖片截自《喜劇之王 》。

據外媒Reuters報導，最近韓國國立蔚山科學技術研究院（UNIST），城市與環境工程系教授Cho Jae-weon發明一款環保馬桶「BeeVi」，以真空泵將糞便抽至地下水箱，減少用水量。並透過微生物將水箱內糞便分解成甲烷，為建築物、電熱水壺、固態氧化物燃料電池（SOFC）提供能量。Cho教授表示每人平均會放排大約500g排泄物，可以轉變成50L甲烷，從而產生0.5kWh電力，能為電動車提供約1.2公里續航力。

為咗鼓勵學生參與，Cho教授更設計咗一種叫「Ggool」嘅虛擬貨幣，只要使用BeeVi環保馬桶，每人每日就可獲得10枚Ggool。貨幣可以用嚟喺學校買嘢，其中包括咖啡、公仔麵、水果甚至書本，只要用電話掃一掃個QR Code就可以用Ggool支付。其中一位研究生Heo Hui-jin就向記者表示，之前都覺得糞便好污糟，但依家就覺得佢喺寶，我哋甚至會食緊飯嗰陣傾「屎」，問同學仔打算用啲幣嚟買咩書。