我哋之前介紹Boston Dynamics嘅機械人或機械狗，大不了都係話佢哋識跳舞、打下空翻，某程度上都係當佢高科技玩具咁睇。但佢哋最新發佈嘅跑酷 (Parkour) 片段，就令人諗起電影《智能叛變》中嘅場面。

喺呢條只有一分鐘嘅片段中，首先可以見到一隻Humanoid 跑過如《Ninja Warrior》第一關嘅「右左右左右高台」、跳過一個目測米令嘅空隙，落地之後再跑上一個「半鑊形」的傾斜彎道，然後再黎一個三連跳落於一條平衡木之上。然後另一隻Humanoid於平衡木上出發，反向完成半鑊形彎道。接下來就係個人認為最驚訝嘅動作：前一隻Humanoid有如大家跳欄杆一樣，清脆俐落地跳過木衡木！最後兩隻Humanoid齊集於高台之上，以兩個後空翻落地完成。

平心而論，呢條所謂跑酷賽道一啲都唔難，除咗最後嗰兩個 (不必要嘅) 後空翻之外，相信大部成年人都能夠輕鬆通過。問題係片段中兩隻Humanoid嘅動作極為準確敏捷，不禁令人想像如果佢跑得最快啲、跳啲再高啲，然後佢仲追住你……咪就係《智能叛變》囉！

不過大家又放心，因為由Boston Dynamics發佈嘅幕後片段中，項目主管Scott Kuindersma明確指出兩隻Humanoid嘅動作都係程式員專為此「賽道」而設，而且經過長時間調較，所以準確啲黎講片段只係顯示出Humanoid嘅機體運動能力。而佢亦估計最少要有20年時間，機械人先會「與人類一同生活」。