轉軚！棄Samsung S6 edge買S6？

文：MenClub Patrick　　圖：MenClub
POSTED ON 02 Apr 2015

早排Samsung喺西班牙巴塞隆拿作全球發布GALAXY S6同S6 edge嗰陣，世人都將焦點放晒喺S6 edge身上，當時筆者同唔少人仲認為S6 edge值得買過S6。不過，尋日Samsung喺香港舉行埋發布會，我哋一班傳媒見完摸完實物之後，有多都轉咗軚，覺得要買都係買番S6算數！

4大轉軚原因
1. S6 edge冇想像咁好揸起初大家以為S6 edge兩邊屏幕都呈弧形咁彎向下，揸上手會幾好揸，但實際拎佢上手之後，先發覺成部機嘅橫切面有少少似梯形，左右兩邊其實幾「尖筆甩」，大力揸嘅話會有啲「銀手」。反而S6四條邊都微微咁樣拱起，線條有少少圓，幾好揸手！
Samsung GALAXY S6 edge Samsung GALAXY S6
2. S6實物外觀都唔差之前睇相，見S6 edge因雙曲芒設計而令機身更顯slim，而S6則繼續keep住S系一貫個樣，所以覺得S6 edge比較靚仔。但當見到實物之後，又覺得S6轉用咗金屬加玻璃外殼之後，賣相又唔差喎，外觀分數唔輸蝕過S6 edge好多，唔使一定揀S6 edge。
不論S6 edge（上圖）定係S6（下圖），男人單手用機都OK。
3. 雙曲芒冇乜實際功用 S6 edge兩邊嘅曲芒，睇落似乎只係玻璃有曲，顯示面板並冇彎曲，所以除咗屏幕邊緣會見到折射之外，成個畫面係同正常屏幕一樣嘅，冇乜實際功用。雖然佢都有介面將部分app按鈕同聯絡人icon放喺屏幕最右邊，方面用家單手用機嗰時㩒，但親手㩒完又唔覺特別好㩒。而S6就算大部少少，但男人依然一手操控得晒。
介面能將聯絡人造成icon，擺喺屏幕最右邊，畀人以右手單手用機時，用手指公去㩒，但實試過唔算好方便。屏幕右邊邊緣仲能夠顯示時間、天氣等資訊，等人闔埋保護套cover嗰陣都睇到。若然閣下好似筆者咁，手指公下面嚿肉比較大嘅話，篤機嗰陣其實幾易唔覺意掂到介面其他掣。
4. S6 edge定價超乎預期　S6竟有雙卡雙待最重要嘅轉軚原因－－價錢！之前係人都預咗S6 edge會貴一截，但都冇諗過最終開價竟然係$6,598（32GB版）同$7,498（64GB版）！相比之下，賣$5,698嘅S6真係可接受好多喎！唔好忘記，兩部機嘅主spec.其實係一模一樣，港版S6仲要出乎意料地有埋雙卡雙待功能，兼且對應晒中港嘅4G同3G網絡，實在抵用好多喎！好可能連Samsung根本都諗住用S6做主打，S6 edge只係用嚟show off同製造話題。
S6嗰兩條SIM卡槽設喺機側，而S6 edge因為只得一條SIM卡槽，機頂都夠位，所以就擺咗喺機頂。
主鏡頭改進有驚喜睇完筆者同唔少行家覺得S6比較值得買嘅原因之後，Gentlemen最終點揀，就留番畀各位決定喇，不過都要再講番兩部機同上代S5有咩唔同。今次最令筆者驚喜嘅，係兩部機個機背鏡頭！雖然佢哋嘅像素同S5一樣係1,600萬，冇提升到（其實我覺得升嚟都無謂），但就加入咗f1.9大光圈同OIS光學防震系統，試拍後真係覺得啲相靚咗唔少，尤其係喺好暗嘅室內影相嗰陣。最正仲係兩部機機背鏡頭嘅對焦速度都明顯比S5快咗好多，連對焦框都未見到，就已經對好焦兼影埋相，真心值得讚！至於兩部機嘅前置鏡頭，亦終於由200萬像素增至500萬像素。
後置1,600萬像素鏡頭試相難得喺咁暗嘅環境下影相，相質依然唔錯。前置500萬像素鏡頭試相有120度廣角效果，但四邊邊緣位變形問題幾嚴重，自拍嗰陣要留意。機背鏡頭旁邊嗰3粒，除咗有補光燈之外，仲有心跳感應器，自拍嗰陣可以篤佢嚟代替篤芒㩒快門掣。
屏幕．處理器升級　新增快速充電功能其他方面，兩部機嘅屏幕解像度由S5嘅Full HD水平，提升至1,440x2,560的2K級數，而尺寸則維持是5.1吋不變，所以畫面線數大幅增加至577ppi，不過就初步觀察，卻唔覺畫質有太明顯升呢。至於處理器，就由S5嘅四核心，變成今代兩部機嘅四加四核心，當然仲支援埋64-bit啦，而RAM都加到3GB，追上番最新嘅旗艦機要求。仲有，S6同S6 edge都新增咗快速充電功能，叉得比S5快1.5倍，只需10分鐘就能叉到夠用4個鐘的電量，同埋兩部機亦會支援新發表嘅Samsung Pay付款服務。不過，今次兩部機冇得插microSD卡，焗人買高容量版本，而且冇得換電，總係爭咁啲！
S6 edge嘅安兔兔跑分成績，爭好少就有50,000分，跑贏Note 4，合乎預期。而S6無論CPU同RAM都同S6 edge一樣，理應都有相同效能。 S6 edge（左）及S6（右）體型比較 S6 edge（左）機身面積比較細，但厚度卻比S6（右）厚0.2mm，不過摸上手都係覺得S6厚啲。 S6 edge同S6所有版本都提供白、黑、金3隻基本色。 S6就另外提供多一隻特別少少嘅藍色版。想用最特別嘅錄色嘅話，就要買最貴嘅64GB版S6 edge。
Samsung GALAXY S6、S6 edge規格售價：$5,698（S6 32GB雙卡版）　　　$6,598（S6 edge 32GB版）　　　$7,498（S6 edge 64GB版）系統：Android 5.0 制式：TD-LTE、FDD-LTE、TD-SCDMA、WCDMA、GSM（S6支援雙卡雙待功能）屏幕：5.1" 1,440x2,560 Super AMOLED（S6 edge具備雙邊曲面側屏幕）處理器：四核心2.1GHz+四核心1.5GHz 記憶體：3GB RAM 鏡頭：後置1,600萬像素、前置500萬像素儲存空間：內置32/64GB 電池：內置式2,550mAh（S6）/內置式2,600mAh（S6 edge）體積：143.4x70.5x6.8mm（S6）/142.1x70.1x7.0mm（S6 edge）重量：140g（S6）/132g（S6 edge）顏色：白/黑/金（S6及S6 edge 32GB、64GB版）/藍（S6）/綠（S6 edge 64GB版）推出日期：4月10日查詢：Samsung　www.samsung.com/hk