據報WhatsApp目前正測試一系列新嘅私隱設定，其中一個新功能就係容許用家自行選擇向某啲特定聯絡人隱藏最後上線時間 (即Last Seen)。睇黎所有老細以後都唔會見到啲員工嘅最後上線時間啦。

目前WhatsApp用家雖然都能夠選擇向咩人展示最後上線時間，但就只有「所有人」、「聯絡人」同「冇人」三個選項。而據《WABetainfo》報導，目前測試緊嘅WhatsApp Beta版本就多咗一個新私隱設定選擇「聯絡人，除了…」，顧名思義就係容許用家自己選擇向邊啲聯絡人隱藏最後上線時間，如果你有心機時間，更可以做到淨係畀一個聯絡人睇到。

圖片：WABetainfo.com

值得留意嘅係，如果你選擇向某個聯絡人隱藏最後上線時間，咁你亦唔會睇到佢嘅最後上線時間。另外除咗最後上線時間，同樣嘅設定亦適用於個人頭像及簡介部份。目前未知相關功能會幾時更新於正式版之上。

資料來源：WABetainfo.com