VR (虛擬實景) 雖然有無限可能，但到依家都仲係有好多硬件上嘅限制。例如小型嘅VR裝置幀數及刷新率不足好易「暈機浪」，畫面好嘅VR裝置又太大部太重唔能夠長期佩戴使用。既然硬件解決唔到問題，日本嘅Diver-X就決定用設計去解決，推出呢個瞓喺到用嘅VR裝置「Half Dive」。

雖然一般VR裝置都可以戴住然後瞓低，但HalfDive就更進一步，將頭戴式裝置設計成一個枕頭咁款——實際上佢亦係建議大家放喺床上使用——用家只需要躺平就能夠使用，完全免去VR裝置嘅重量。機能方面，HalfDive提供3200x1440 (兩隻眼加埋)解像度、90Hz螢幕更新率，134度最大可視角，仲內置4個喇叭，以及能夠加強遊戲腳步聲及槍聲嘅激勵器 (Exciter)。另外臉頰位置有兩個風扇以幫助通風，甚至按遊戲環境而改變風力。另外亦有力度反饋以反映遊戲中嘅摩擦力。

操控方面，目前公佈咗綁喺腳板嘅腳部控制器，透過傾斜角度黎控制人物站立或蹲下。至於手部控制器就要月尾先公佈。

你可能會話，「我唔玩VR Game架喎，呢舊嘢唔關我事啦！」但你又有冇留意過，日本「愛情動作電影」界近年積極發展嘅「VR動作片」？依家有個瞓喺到用、高清、靚聲、仲有風嘅VR裝置，你想唔想像到人生可以有幾咁美好？

唔美好嘅就係個價錢啦。據知HalfDive最簡單、只包頭部裝置及手部控制器嘅普通版，眾籌價將要8萬Yen (約HK$5650)、要哂所有模組嘅Pro版要12萬Yen (約HK$8500)，最高級嘅「高級版」要40萬Yen (約HK$28300)。唔……冇咩事我都係返去就咁躺平算啦。