上星期就有報導指Facebook將會以「Metaverse (元宇宙)」為發展方針，並會更改公司名稱。而創辦人Mark Zuckerberg於昨日舉行嘅年度發佈會Facebook Connect中就正式公佈，「Facebook」會改名做「Meta」，未來將會以Metaverse，而非單純嘅社交媒體作為發展主軸。

所謂Metaverse，簡單黎講就即係電影《Ready Player One》隻Game咁，係一個虛擬，但又令用家如親歷其境嘅世界；具體黎講就即係大家就算未玩過都知係咩嘅Virtual Reality (虛擬實景，VR)及Augmented Reality (擴增實境，AR)。Meta於公告中多次強調「Metaverse」會包含社交、工作、娛樂甚至運動等體驗。例如會於Oculus (同屬Facebook旗下) 早前推出嘅「Home」——一個虛擬屋企為基礎，開發成可以邀請朋友黎作客，甚至一齊睇片打機嘅「Horizon Home」。另外亦會有「Horizon World」、「Horizon Workroom」等睇個名就大概知係做咩嘅應用。你甚至可以於Home之內碌Facebook、IG、用Dropbox，又或者收發訊息、來電——注意，係你身在虛擬世界中打界現實世界中嘅人。

另外Meta亦會推出Presence Platform供創作者連結虛擬及現實世界，又會投資1.5億美金訓練下一代創作者。早前Mark Zucberberg亦指會聘請多一萬名高薪技術員。

所以，Meta嘅願景就係透過VR、AR、以及佢哋早前推出嘅智能眼鏡等技術，創造一個更多層面、更真實嘅虛擬世界。聽落好似非常美好，但亦有唔少人從技術 (例如器材嘅流動性、網絡要求)、需求 (真係有人想要同老細黎一場非常像真嘅視象會議？)等方面提出疑問，另外亦有指呢場大龍鳳只係希望將公眾及有關當局嘅視線，從FB近年捲入嘅反壟斷、假消息、以至社交媒體對公眾心理健康等問題上轉移。當然亦有人擔心最終會發展如電影情節嘅「科技巨企控制一切」。

但反正，Mark Zuckerberg就擺足姿態話畀大家知佢要搞Metaverse，就連目前Facebook個美股名都會於12月1日改成Meta (MVRS)。而Facebook、Instagram、WhatsApp等服務暫時就唔會改名。