從使Microsoft Edge瀏覽器係基於Chromium開發，而且又有唔少人唱好，但市佔率始終遠遠比唔上Google Chrome。最近Microsoft就諗咗條新橋嘗試留住用戶，每當透過Edge瀏覽Chrome下載頁面，就會即時彈個略帶諷刺嘅「溫馨提示」出嚟。

據外媒《Neowin》報導，最近人有想透過Edge下載Chrome嗰陣，瀏覽器突然彈出一句略帶諷刺嘅溫馨提示，勤人唔好用已經過時嘅Chrome，Edge更加安全、性能更強大。目前總共發現有三個版本嘅提示字句，分別係「Microsoft Edge runs on the same technology as Chrome, with the added trust of Microsoft.」、「That browser is so 2008! Do you know what’s new? Microsoft Edge.」以及「‘I hate saving money,’ said no one ever. Microsoft Edge is the best browser for online shopping.」

Microsoft calls Chrome 'so 2008' as part of the ongoing browser war. There are three prompts being seen.

Here's the prompt calling Chrome "so 2008":
"That browser is so 2008! Do you know what's new? Microsoft Edge." https://t.co/hmSTOkir3v pic.twitter.com/kCeEkTdgpo

— Glenn Gabe (@glenngabe) December 2, 2021

經過實測，就算系統語言係中文都會有呢個提示出現，但目前只發現到一個用字較為中性嘅版本。另外有趣嘅係，呢個「溫馨提示」只針對Google Chrome，瀏覽Firefox、Opera以及Brave等下載頁面唔會出現相關提醒。

根據調研機構StatCounter最新數據，目前全球最多人用嘅瀏覽器係Google Chrome（64.06%），其次就係Safari（19.22%），排第3嘅Edge市佔率只有4.19%，睇嚟Microsoft想扭轉局面嘅話，需要諗多啲新招啦！

（圖片截自：statcounter）