自Facebook改名做Meta後，「元宇宙（Metaverse）」隨即變成全球熱話，多間企業亦相繼宣布要進軍元宇宙領域。正當你以為元宇宙係俾大家喺虛擬世界做現實做唔到嘅嘢，周圍玩、睇風景、識吓朋友嗰陣，Microsoft就話你知，其實元宇宙仲有娛樂以外嘅用途㗎！事關佢哋即將推出嘅元宇宙有齊PowerPoint、Excel，等大家喺虛擬世界都可以返工！

早前Microsoft喺Ignite 2021大會上表示，預計2022年上半年度將會推出「Mesh for Microsoft Teams」進軍元宇宙，簡單嚟講就係一個結合VR及AR技術嘅視像會議軟件（你當係升級版Zoom啦），用家能夠透過虛據替身喺入面辦工，分享PPT、Excel等Office文件，並可以透過AI技術模擬返你真人嘅動作同手勢，等你個替身present嗰陣更加入形入格。

除此之外，為提供沉浸式返工體驗，「Mesh for Microsoft Teams」仲可以俾用戶定制唔同嘅Office裝修，有興趣嘅話大可以跟足現實Office，令員工恍如置身現實世界。相信呢個科技普及後，第時無論疫情打風落雨塞車都可以順順利利準時返工，訴求係返工嘅黎生亦都唔使再怕冇車搭返公司。