我知大家一定係因為見到張圖入面嗰條又粗又黑，一頭呈半圓球體嘅物件，覺得佢非常熟口熟面，所以先撳入黎睇下呢款新電池係咩一回事。不過麻省理工大學 (MIT)發明嘅，其實唔係呢條棒狀物，而係棒狀物身上嗰一圈圈好似電線嘅物體。

隨住鋰電池越黎越普遍，研究人員都希望研製出有不同特性、形狀嘅鋰電池，令其用途更為廣泛，當中能夠織入衣物當中嘅「線形」就係其中一個方向，過往亦有成功例子。而MIT嘅造法，就係先於一個圓筒形外包材料之中，將所有電池零件組合，然後將整組嘢加熱再推過一個小孔，喺唔改變入面電池零件排列位置嘅情況下「拉」出一條幼線，而呢條幼線就係鋰電池本體。

右邊為MIT嘅新電池，有一定抗燃能力

即使切斷電池亦能繼續運作

用呢個方法整出黎嘅鋰電池直徑只有數百微米，而且可以整到極長。MIT目前整咗條長140米、電量123mAh 嘅試製品，但佢哋話理論上其實可以整到「以公里」計咁長。另一個嘅好處就係鋰電池本身就包裹於電極凝膠 (Gel Electrodes) 及凝膠電解質 (Gel Electrolyte) 之中，令電池防水及有一定抗燃性。電池本身亦可結合3D打印技術，理用電池本身作為物件結構同時供電，上面張圖嗰條又黑又粗嘅物體，其實就係MIT整出黎示範、利用圈喺身上嘅電池推動嘅玩具潛艇。

資料來源：MIT