自2013年問世嘅PS4，由當初嘅厚機一路改良成薄機甚至Pro機型，陪伴一眾機迷征戰多年，理應就喺PS5推出後正式步入歷史嘅，之不過由於PS5依然嚴重供不應求，最近就有消息指Sony今年會繼續生產約100萬部PS4應對缺貨問題。

據Bloomberg引述知情人士消息，Sony曾經打算2021年底停止組裝PS4，但由於PS5持續供不應求，所以決定今年繼續生產大約100萬部PS4，實際數字會因需求調整。而且PS4主機無需使用先進晶片，生產更為簡單，將成為PS5嘅廉價替代品。

眼見PS5產量不足，Sony選擇續產PS4為機迷提供過渡都正常嘅，而且目前大部份新出遊戲都有PS4版本，但問題係究竟有幾多打算加入PlayStation嘅人，唔介意退而求其次買部PS4玩住先呢？